Нөкцлт сән ашт күргнә

08-10-2026, 12:34 | Общество, Таңһчин зәңгс, Зіњг

Үвлзлһнд малын хот белдлһн цуг эдл-ахусин төлә хамгин чинртә кем болна. Сәәнәр белдхин төлә малчнр ик көдлмш күцәнә. Тер көдлмшин йовудыг түргдүлхин, малын хотын кемҗәг икдүлхин, шим-шүүсинь элвҗүлхин төлә Хальмг ик сурһулин номтнр болн «Булһн-трейд Агро» бүрдәцин көдләчнр иим янзта төсвиг күцәмҗтәһәр делгрүлҗәнә.
Уста һазрт элвгәр һардг хулсна болн бәәрн кесг ноһан урһмлын холянас кевлүлсн малын хот шин төсвин ул деер белдгдх. Хальмг ик сурһулин номтнр терүнә номин ул-сүүринь тогтахмн. Эдн лабораторин болн зоотехникин салврин шинҗллт кеҗ, белдсн хотыг малд өгхмн. «Булһн-трейд Агро» бүрдәц болхла эврә талвң-аһуһан өгсн деер кевллһнә технологийәр малын хот ик кемҗәтәһәр һарһхмн.
Малын чинән ямаран түргәр өсдгинь йилһҗ авхин төлә хөд дөрвн багд хувагдв. Эдниг 90 өдрт шимтә-шүүстә хотар бордх. Тер нүүрлгч технологиг номтнр профессор Анатолий Лебедевин һардврт үүдәв.
– Ода бидн хөөдин төлә теҗәл белдҗәнәвидн, тернь шаңһа даалһврин некврин кемҗәнд күцәгдҗәнә. Олн зүсн урһмлын холян белн болв. Шин эв-арһар кесн зүсн зүүл малын хот ик кемҗәтәһәр белдҗ болхмн. Тер саамд малын чинән чигн өсәд бәәхмн, – гиҗ профессор А.Лебедев келв.
«Тиим өдгә цагин технологийин ул деер белдсн шимтә-шүүстә малын теҗәл цуг үзмҗиг өөдлүлҗ малын то икдүллһнә чилшго бат көрңгнь болхмн, тернь таңһчин селәнә эдл-ахун делгрлтд ик тусан күргхнь лавта. Хальмг ик сурһульла бидн малын хот һарһлһна туск бооца батлвидн. Ода тер төсвән эклҗ күцәҗәнәвидн. Кевлүлсн малын хотын түрүн кемҗәг бидн белдвидн, тернь мана көдлмшин сән эклцнь болх. Тер теҗәлин һол хүвнь эд-бод кесн үүрмглсн хулсна болн зарм, йөркг, нань чигн ноһан урһмлын холян болхмн, талдан чигн урһмл немгдхмн.
Номтнрин кесн шинҗллтин ул деер бидн малын хотын олз-тусинь өөдлүлҗ сән чинәтә мал өскҗ, то икдүллһнд мана шин эв-арһ туслх гиҗ нәәлҗәнәвидн», – гиҗ «Булһн-трейд Агро» бүрдәцин һардач Кукана Җаңһр темдглв.
Селәнә эдл-ахун бүрдәцин болн Хальмг ик сурһулин номтнрин нөкцлт сән ашта болҗ малын хотын бат көрң белдлһнд болн малын то икдүллһнд сән нилчән күргтхә, дигтә-дарата, номин бат ул деер күцәҗәдг хамцу үүлдврнь эрк биш шин күцәмҗин бат улнь болхмн гиҗ иткҗәнәвидн.

ТҮРВӘН Һуна

Видео