Шидр Крым Республикин Ялта балһснд Әрәсән Өмн үзгин парламентсин Ниицәнә (ЮРПА) 45-ч хург болв. Әрәсән Өмн үзгин арвн һурвн региона болн Абхазь Республикин зака үүдәгч Хургудын элчнр энд цуглрв. Хальмг Таңһчин Улсин Хуралын (Парламентин) Ахлач Артем Михайлов һардсн багин ханьд энүнә дарукс Бадмин Вячеслав болн Нуура Николай хургт орлцв. Депутатнр Салан Бадм болн Эрднин Гилән болхла ниицәнә әңгүдин сүүрт видеозалһлдана эв-арһар орлцҗ, хәләгдсн төрмүдәр ухан-тоолврарн хувалцв.

Хальмг Таңһчин Толһач Хаска Бату бурхн-шаҗна үүлдәчнрин төв заллтын ахлач, гевш Йонтенлә хамдан «Алмазная колесница. Буддийское искусство России» гидг һәәхүлд орлцв. Әрәсән бурхн-шаҗна билг-эрдмин туск төсв түрүн болҗ күцәгдв. Терүнд Хальмгин, Бурятин, Тыван болн орн-нутгин нүүрлгч музеймүдин әрүн чинртә 700 һар тоот олна оньгт тусхагдв. Пушкинск музейд секгдсн һәәхүлиг олн-әмтн хәләхәр ирв.

Арвн җилин эргцд үкр сарин эклцәр, Әрәсән улсин ниицлтин Өдр угтҗ, мана орн-нутгт «Этнографин ик диктант» гидг керг-үүлдвр болна. Әрәсән Президент Владимир Путинә зәрлгәс иштә зарлгдсн орн-нутгин улсин ниицлтин җилд эн керг-үүлдвр арвн негдгч кемдән келн-улсин тууҗин, сойлын болн авъясмудын төрәр давулгдхмн. Шидр Хальмг Таңһчин Толһачин һардврин келн-улсин болн хазгудын керг-төрин заллтын әңгин һардач Владимир Ожередов болн Амр-Санана нертә Келн-улсин дегтрин саңгин һардачин дарук Бутикә Саглр седкүлчнрлә харһад, мана таңһчд эн керг-үүлдвр яһҗ бүрдәгдхин тускар келҗ өгв.

Хулһн сарин 23-д Элстд Әрәсән келн-улсин оркестрмүдин наадм эклв. Түрүн болҗ иим ик керг-үүлдвр мана таңһчин хотл балһснд болҗана. Наадмин билг-эрдмин көтлврин һардач Катан Савр, наадмин һардач Нимгрә Оксана, Келн-улсин оркестрин дууч, Хальмг Таңһчин ачта артистк Анҗан Саглр болн наадмин зүүцүләч Конан Цедн терүнә тускар «Калмыкия» зәңгллһнә бүрдәцин төвд болсн харһлтд келҗ өгв. Әрәсән сойлын министерств эн керг-үүлдвриг дөңнҗәнә.

Әрәсән, Ирана, Азербайджана, Казахстана болн Туркменистана толһачнрин хамцу тоолврар ул кеҗ, 2025 җилд Тегеран балһснд болсн Көк теңгсин көвән нутгудын ик цуглранд ирлцңгү хург Әрәсән Федерацд давулх шиидвр батлгдла. Әрәсән номин болн ах сурһулин министерств мана ик сурһулин ул деер номин-дамшлтын хург бүрдәх даалһвр маднд өгв. Хальмг ик сурһульд иткҗәхин темдг болҗана.

Бурхн Багшин Алтн сүмин һардврин үрврәр Хальмг Таңһчд Дрепунг Гоманг хурлас гелңгүд ирв. Эдн мана таңһчд мандлмуд босххмн. Гелңгүдин делегациг гевш- лхарамб Лобсанг Шакья һардҗ ирв. Урдк җилмүдт мет мандлмуд Элстәс нань райодт бас босхгдх болв. Тегәд олн улст шаҗна эн үүлдврт орлцҗ, зальврх таал учрҗана.

Көтчнр селәнд Очра Номтын нертә урһа моддын шишлң бәәр тосхлһна көдлмш төгсәхин төлә шидр Элстд буйнч седклин концерт болв. Района медәтнрин хүүвин гешүдин седвәрәр тосхгдҗадг ирлцңгү бәәрн төгсхдән өөрдҗ йовна, терүг хулһн сарин 30-д секхәр зуралҗана. Болв цуг көдлмш төгсәһәд, сән кец-таал тогтахин төлә олн-әмтнә дөң керглгдҗәдг болна.

Хальмг Таңһчин Толһач Хаска Бату сурһулин, үүдәлтин болн билг-эрдм делгрүллһнә бүрдәцст өдгә цага сән таал тогтагдҗахиг темдглв. Тиигәд шаңһа көтлврмүдин болн келн-улсин төсвсин йовудт ясврин көдлмш кегдснә ашт дегтрин саңгуд ода олн халхин өдгә цага төвмүдт хүврҗәнә гиҗ таңһчин Толһач темдглв.

Шидр Хальмг Таңһчин Толһач Хаска Бату Москва балһснд «Алтн бүс» гидг цергә билг-эрдмин XVI Келн-улсин мөрән дииләчнриг ачллһна байрин керг-үүлдврт орлцв. Таңһчин Толһач җилин сән гисн спортсмен болсн Константин Шахтаринд ачлвринь бәрүлҗ өгв. Пермь һазра спортсмен муайтай бәрлдәнә халхар дөрвн дәкҗ нарт-делкән чемпиона нер зүүһәд, Әрәсәд хамгин ик күцәмҗ бәрсн бөк болна.

Хальмг Таңһчин социальн делгрлтин, күч-көлснә болн көдлмшәр тетклһнә министерствин седвәрәр һурвн җил дарандан олн үртә өрк-бүлмүд дунд «Өрк-бүлин сән гисн эдл-аху» гидг марһан давулгдҗана. Селән һазрт бәәдг улсиг урмдулхин, эврә эдл-аху бәрҗ өрк-бүлән теҗәдг өрк-бүлмүд үлгүр болхин төлә эн марһан бүрдәгдсн болдг. Октябрьск района Цаһан Нур селәнд бәәдг Хоңһр болн Байир Нуровихнә (зургт) өрк-бүл эн җил таңһчин марһанд 2-ч орм эзләд, 50 миңһн арслңга мөрәһәр ачлгдв.