Төрскн нутгин тууҗин тускар

24-10-2026, 11:33 | Общество, Таңһчин зәңгс, Зіњг

Арвн җилин эргцд үкр сарин эклцәр, Әрәсән улсин ниицлтин Өдр угтҗ, мана орн-нутгт «Этнографин ик диктант» гидг керг-үүлдвр болна. Әрәсән Президент Владимир Путинә зәрлгәс иштә зарлгдсн орн-нутгин улсин ниицлтин җилд эн керг-үүлдвр арвн негдгч кемдән келн-улсин тууҗин, сойлын болн авъясмудын төрәр давулгдхмн. Шидр Хальмг Таңһчин Толһачин һардврин келн-улсин болн хазгудын керг-төрин заллтын әңгин һардач Владимир Ожередов болн Амр-Санана нертә Келн-улсин дегтрин саңгин һардачин дарук Бутикә Саглр седкүлчнрлә харһад, мана таңһчд эн керг-үүлдвр яһҗ бүрдәгдхин тускар келҗ өгв.
Владимир Ожередовин келсәр, Хальмг Таңһчин улс эн керг-үүлдврт җил болһн шунмһаһар орлцна. Орн-нутгин келн-улсин бәәдл-җирһлин, тууҗин болн сойлын туст медрлән сөрҗ үзх саната әмтнә төлә үкр сарин 3-ас авн 12 күртл эн керг-үүлдвр болхмн. Тиигчкәд, терүг давуллһна ормд ирҗ эс гиҗ ниигмин сүлҗәнә эв-арһар даалһврмуд күцәҗ болхмн. Элстд Амр-Санана нертә Келн-улсин дегтрин саңд болн Б.Б.Городовиковин нертә баһчудын Герт үкр сарин 3-д, Н.Пальмовин нертә Келн-улсин музейд болхла үкр сарин 5-д ирәд, диктантын даалһврмуд күцәх арһ учрҗана. Керг-үүлдврт орлцачнр 30 сурврт, 16 нас күрәд уга арвтнр болхла 20 сурврт 45 минутын кемд хәрүһинь өгх зөвтә. Күн болһн ик гиснь 100 балл хоршаҗ чадхмн.
- Келн-улсин дегтрин саң арвн җил дарандан эн керг-үүлдвр бүрдәһәд, терүнд орлцачнрт сән таал тогтана. Эн җил Әрәсәд улсин ниицлтин җил болҗана, тегәд мана таңһчд бәәдг олн келн-улсин элчнрт терүнд орлцх үрвр кеҗәнәвидн. Үкр сарин 3-д 11 часла мана бүрдәцд болх керг-үүлдврт иртн гиҗ оютнрт бас дуудвр кеҗ, медрлән сөрҗ үзхиг сурҗанавидн. Мана таңһчин әмтн җил болһн шунмһа кевәр орлцна, дундлад эдн 50 балл хоршана. Темдглхәс, олн келн-улсин бәәдл-җирһлин, тууҗин халхар гүн медрл үзүләд, 100 балл хоршасн улс баһ биш, - гиҗ Саглр Анатольевна цәәлһв.
Келхд, эн җил керг-үүлдврин бүрдәһәчнр Әрәсән улс дунд сән гисн сурврин марһа зарлад, терүнд диилвр бәрсинь онц белгәр ачлхмн. Мана таңһчин әмтн терүнд бас орлцҗ сурвран илгәснь ончта.
ДООҖАН Наталья

Видео