Эргндк бәәдл шинҗлдг нарт-делкән төв болхмн

24-10-2026, 10:49 | Общество, Таңһчин зәңгс, Зіњг, Сурєуль-эрдм

Әрәсән, Ирана, Азербайджана, Казахстана болн Туркменистана толһачнрин хамцу тоолврар ул кеҗ, 2025 җилд Тегеран балһснд болсн Көк теңгсин көвән нутгудын ик цуглранд ирлцңгү хург Әрәсән Федерацд давулх шиидвр батлгдла. Әрәсән номин болн ах сурһулин министерств мана ик сурһулин ул деер номин-дамшлтын хург бүрдәх даалһвр маднд өгв. Хальмг ик сурһульд иткҗәхин темдг болҗана.
Көк теңгсин көвән региона төрмүдиг ик сурһульмудын номтнр, күрәлңгүдин мергҗлтнр хамцу хаһлх зөвтә. Бидн эргндк бәәдл шинҗллһнә бачм төр хаһлҗ чадх мергҗлтнриг номин-дамшлтын хургт цуглулҗанавидн. Номтнр тоолврарн хувалцҗ, хамцу төсвс, нөкцлтин туск бооцас батлҗ нарт-делкән болн вузмудын хоорндк нөкцлтиг өргҗүлҗ цааранднь көдлхлә ик туста болхмн. Тиим кевәр Хальмг ик сурһуль Көк теңгсин көвән регионд эргндк бәәдлин шинҗллтиг күцәдг нарт-делкән төв болҗана, - гиҗ чинртә керг-үүлдвр бүрдәлһнә тускар Хальмг ик сурһулин һардач Салан Бадм цәәлһв.
Кедү орн-нутгин ик сурһуль орлцхин тускар Хальмг ик сурһулин һардачин дарук Конин Оксана цәәлһв. Әрәсән орлцачнрас 41 эрлһн ирсн бәәнә. Тер тоод Хальмг Таңһчас хойр, Дагестан Республикәс дөрвн, Әәдрхнә мүҗәс дөрвн, Москваһас негн, Ростовин мүҗәс бас нег бүрдәц орлцх. Казахстанас Атырау балһсна Х.Досмухамедовин нертә ик сурһуль, Казахстан Республикин Келн-Улсин номин академь болн номин нань чигн бүрдәцс орлцх, кесгнь Хальмг ик сурһульла бат залһлда бәрҗ үүлднә. Иранас Гилянск ик сурһуль, Хомейни Имамин нертә Нарт-делкән ик сурһуль, селәнә эдл-ахун номин болн йиртмҗин көрңгин Горганск ик сурһуль бас заагдв. Тер мет Әәдрхнд бәәдг Ирана элч хургт орлцҗ номин нөкцлтин тускар тоолвран келх.
Азербайджанас архитектурин болн тосхлтын, зуульчллһна болн менеджментин ик сурһульмудын номтнр кесг керг-үүлдврт орлцх болв. Тер мет Узбекистанас Самаркандын мал эмнлһнә болн биотехнологийин болн Ташкентин архитектурин болн тосхлтын ик сурһульмудын номтнр Көк теңгсин региона орн-нутгудла нөкцлтҗ чадх гиҗ сангдна. Тер тоод Махтумкулин нертә Туркменистана шаңһа ик сурһулин, Туркменя һазадын орна министерствин нарт-делкән хәрлцәнә күрәлңгин болн Мыра Гаррыевин нертә эмнлһнә ик сурһулин номтнр хургт орлцх гиҗ күләгдҗәнә.
Элстд хулһн сарин 26-д - 27-д нарт- делкән хург болхмн. Түрүн өдрт Көк теңгсин көвән региона делгрлтин тускар күүндвр болх. Үдин хөөн ус цеврлһнә, элсрлһиг ууруллһна төрмүдәр сүүр бүрдәгдх. Һурвдгч сүүрт мергҗлтнр региона делгрлтин туск тоолврарн хувалцхмн.
Номтнрин цаг-зуурин коллективс бүрдәлһнә болн нань чигн 6 бооцан эн хургин йовудт батлгдх. Терүнә ашт хамцу шинҗллт кегдх, Көк теңгсин орн-нутгудын багшнр болн оютнр дамшлтарн хувалцҗ, хоорндан сольлца кех. Тиим кевәр Хальмг ик сурһуль шинҗләчнрин нарт -делкән талвңд хүврҗ, номтнрин көдлмшинь зүүцүлҗ, ик туста нөкцлт батлҗ чадх.
ТҮРВӘН Һуна

Видео