Келн-улсин айс Элстд күңкнх

24-10-2026, 11:32 | Общество, Таңһчин зәңгс, Зіњг

Хулһн сарин 23-д Элстд Әрәсән келн-улсин оркестрмүдин наадм эклв. Түрүн болҗ иим ик керг-үүлдвр мана таңһчин хотл балһснд болҗана. Наадмин билг-эрдмин көтлврин һардач Катан Савр, наадмин һардач Нимгрә Оксана, Келн-улсин оркестрин дууч, Хальмг Таңһчин ачта артистк Анҗан Саглр болн наадмин зүүцүләч Конан Цедн терүнә тускар «Калмыкия» зәңгллһнә бүрдәцин төвд болсн харһлтд келҗ өгв. Әрәсән сойлын министерств эн керг-үүлдвриг дөңнҗәнә.
Ар үзгин Осетин, Башкортостана келн-улсин болн Санкт-Петербургин «Метелица» оркестрмүд наадмд орлцҗ билг-эрдмән үзүлх. Эдн хальмг улсин бииһин болн дууна айсиг, хальмг көгҗмчнр Чонкуша Петрин болн Манҗин Аркадин, Катан Савр үүдәсн «Җаңһрин бәәшң» гидг үүдәврмүдиг наадх. Талдан келн-улсин оркестрмүдин наадсн хальмг айсиг дахч Мергн Ким, Каҗин Елена, Шалхана Данара болн нань чигн дуучнр дуулҗ, әмтнә седкл авлхнь лавта. Тегәд наадмд Элстин болн райодын әмтн олар ирҗ орлцхинь наадмин бүрдәһәчнр күләҗәнә.
Наадмин гиичнр эврә келн-улсин үүдәврмүд чигн наадх. Элстд болҗадг оркестрмүдин наадм Әрәсән Президент Владимир Путин зарлсн Әрәсән келн-улсин ниицлтин җилин йовудт йоста кеермҗнь болҗана. Наадм үкр сарин 3 күртл Хальмг филармоньд болхмн, концертс 18.30 часла эклх.
Санкт-Петербургин орс зевсгүдин «Метелица» оркестр хулһн сарин 23-д билг-эрдмән үзүлв. Тер мет деер келгдсәр, Хальмг Таңһчин Келн-улсин оркестр болн хальмг артистнр гиичнрлә хамдан хамцу концерт бурдәхмн.
Бас тиим ик нәр хулһн сарин 30-д Ар үзгин Осетин Булат Газдановин нертә Келн-улсин оркестрлә хамдан бүрдәгдх болв. Үкр сарин 3-д ашлгч концертд Башкортостана Келн-улсин оркестр хальмг оркестрлә хамдан билг-эрдмән үзүлхмн. Башкир улсин курай болн Дагестана тар зевсгүд, Кавказин гарма татад, хальмг айсиг бас наадх, тиим соньн көгҗмиг наадмин йовудт соңсч болхмн. Оютнр «Пушкинә карт» олзлҗ, концертд ирҗ чадҗана. Наадмин бүрдәһәчнр таңһчин цуг улст ах-дү келн-улсин сойлын нәәрт ирҗ орлцтн, гиҗ дуудвр кеҗәнә.
ТҮРВӘН Һуна

Видео