«Санлын болн иргчин төлә»

24-10-2026, 10:34 | Общество, Таңһчин зәңгс, Зіњг

Көтчнр селәнд Очра Номтын нертә урһа моддын шишлң бәәр тосхлһна көдлмш төгсәхин төлә шидр Элстд буйнч седклин концерт болв. Района медәтнрин хүүвин гешүдин седвәрәр тосхгдҗадг ирлцңгү бәәрн төгсхдән өөрдҗ йовна, терүг хулһн сарин 30-д секхәр зуралҗана. Болв цуг көдлмш төгсәһәд, сән кец-таал тогтахин төлә олн-әмтнә дөң керглгдҗәдг болна.
- Мана концерт нертә номт болн олна үүлдәч Очра Номтын нер мөңкрүллһнә кергт нерәдгдҗәнә. «Зүркнәсн зүркнд – санлын болн иргчин төлә» гиҗ нерәдгдснь хара биш юмн. Нарт-делкәд хальмг улсин «Җаңһр» баатрлг дуулвриг медүлсн, хальмг амн-үгин зөөр хадһллһнд ик ач-тусан күргсн нег һазра мана алдр үрнә нер хадһлҗ, энүнә тускар дорас өсч йовдг бичкдүдт күргҗ медүлх зөвтәвидн. Района медәтнрин седвәриг әмтн дөңнҗ, арһ-чидлән хамцулҗ эн кергт шунмһаһар орлцҗахнь бахмҗта. Нег һазра улс демән күргв, кесгнь тосхлтын көдлмшт орлцҗана. Концертд ирсн улст ханлтан өргҗәнәв. Олна дөңгәр мана керг бүтх гиҗ ицҗәнәвидн», - гиҗ Көтчнрә района толһач Азота Санл концертин эклцәр келв.
Хальмг Таңһчин Улсин Хуралын (Парламентин) депутатнр Кокан Михаил болн Мацга Татьяна, Хальмг Таңһчин сойлын болн зуульчллһна министр Бембин Евгений, Хальмг Таңһчин медәтнрин Хүүвин Ахлач Пашнана Эрднь, энүнә дарук, номт Дәкин Раиса, Көтчнрә района медәтнрин хүүвин ахлач Шарапа Геннадий нертә номт Очра Номтын адрута җирһлин хаалһин, энүнә күцәсн кергин тускар дәкәд нег тодлулҗ, көтчнрәхн нег һазра үрнәннь нер мөңкрүллһнә керг бүтәсиг өөдәнәр үнлв. Пашнана Эрднь района медәтнрин хүүвин седвәриг олн әмтн дөңнҗ, Очра Номтын нертә урһа моддын шишлң бәәр секлһнә кергт цуһар орлцҗахиг темдглв. Көтчнрәхн төрскнч болн буйнч седклтә улс болҗахан дәкнәс иткүлв гиҗ келәд, нидн олна дөңгәр хурл босхгдснь бахмҗта йовдл болсиг тодлулв. Хальмг Таңһчин медәтнрин Хүүвин седвәрәр номт болн олна үүлдәч Очра Номтын медаль батллһна туск төр удл уга таңһчин Улсин Хуралын сессьт хәләгдх болв. Таңһчин делгрлтд ач-тусан күргсн улсиг ачлдг болхмн, гиҗ Эрдне Лиджиевич келсиг олн-әмтн байртаһар тосв.
Көтчнрә района бәәрн билгтнр Мацга Анатолий болн Куша Замба, «Иньглән» багин уйн наста дуучнр кен-негнәннь седкл байсаҗ, сергмҗ үүдәв. Хальмг улсин артист Мукөвүнә Кутлан, Хальмг Таңһчин ачта артист Һәрән Лиҗ, Шорван Феликс, Б.Б.Городовиковин нертә Хальмг ик сурһулин «Бумбин орн» ансамблин биичнр буйнч седклин концертд орлцад, Очра Номтын санл мөңкрүллһнә кергиг дөңнв. Концертин ашар 600 миңһн арслң цуглулгдсн болҗ һарв.
ДООҖАН Наталья

Видео