Хальмг депутатнрин седвәриг дөңнв

Сегодня, 12:52 | Общество, Таңһчин зәңгс, Зіњг

Шидр Крым Республикин Ялта балһснд Әрәсән Өмн үзгин парламентсин Ниицәнә (ЮРПА) 45-ч хург болв. Әрәсән Өмн үзгин арвн һурвн региона болн Абхазь Республикин зака үүдәгч Хургудын элчнр энд цуглрв. Хальмг Таңһчин Улсин Хуралын (Парламентин) Ахлач Артем Михайлов һардсн багин ханьд энүнә дарукс Бадмин Вячеслав болн Нуура Николай хургт орлцв. Депутатнр Салан Бадм болн Эрднин Гилән болхла ниицәнә әңгүдин сүүрт видеозалһлдана эв-арһар орлцҗ, хәләгдсн төрмүдәр ухан-тоолврарн хувалцв.
Хальмг Таңһчин Улсин Хуралын (Парламентин) Ахлач Артем Михайлов ЮРПА-н хүүвин сүүрт орлцв. Зака үүдәгч Хургудын ахлачнр хургт хәләгдх төрмүд батлад, Әрәсән Өмн үзгин парламентсин Күндллһнә һашгар ачллһна төр хәләв. Хург давулхас урд ниицәнә әңгүдин сүүр болв, хальмг багин элчнр терүнд шунмһаһар орлцв. Тиигәд, таңһчин Улсин Хуралын Ахлачин дарук Бадмин Вячеслав закана болн бәәрн залврин әңгин сүүрт орлцв, терүнд алвна, гер-бүүрин болн һазрин Әрәсән Кодекст сольвр оруллһна төрәр күүндвр болв. Таңһчин Улсин Хуралын Ахлачин дарук Нуура Николай келн-улсин хоорндк хәрлцәнә, парламентс хоорндк залһлдана, спортын, зуульчллһна болн баһчудын керг-төрин әңгин сүүрт орлцв. Зака үүдәгч Хургудын элчнр эврә сән дурар үүлддг улсин үүлдврин туст седвәр батлв. Сурһуль-эрдмин, номин, сойлын болн зәңгллһнә политикин әңгиг һарддг депутат Салан Бадм ниигмин сүлҗәнә эв-арһар сүүрт орлцад, сурһуль-эрдмин көдләчнрин төлә онц зөв батллһна, ик сурһульд оруллһна диг-даранд болн сойлын туск заканд сольвр оруллһна тускар күүндв. Депутат Эрднин Гилән болхла Хальмг депутатнр Әрәсән күч-көлснә болн социальн харслтын министр Антон Котяковин нернд дуудвр келһнә седвәр татсна тускар келҗ өгв. Нилхд төрлһиг урмдуллһнд орн-нутгин хазнас мөңг йилһдг регионмудын тоод Хальмг Таңһчиг оруллһна тускар тер дуудврт келгдҗәнә. Әрәсән Өмн үзгин регионмудын зака үүдәгч Хургудын элчнр хальмг депутатнрин седвәриг дөңнв.
Дарунь ЮРПА-н хург болв, терүг Крым Республикин Хүүвин Ахлач Владимир Константинов һардҗ давулв. Хургт орлцачнр ут тоодан 61 төр хәләҗ, өргн күүндвр тогтав. Сүүрт селәнә эдл-ахуст немр дөң күрглһнә, мөңг өгъәлҗ авсн арһлачнрт сән таал тогталһна, регионмудын хазнд алвна мөңг олзллһна, цергә шишлң керг-үүлдврт орлцачнрин, баһ наста болн олн үртә өрк-бүмүдиг дөңнлһнә болн нань чигн төрмүд хәләгдв. Әрәсән Өмн үзгин регионмудын зака үүдәгч Хургудын седвәриг дөңнәд, орн-нутгин йосна бүрдәцст терүг йовулх болв.
ЮРПА-н хургин йовудт Хальмг Таңһчин Улсин Хуралын (Парламентин) Ахлач Артем Михайлов болн Крым Республикин Хүүвин Ахлач Владимир Константинов зака үүдәгч Хургудын нөкцлтин туск бооца батлв. Хургин чилгчәр ЮРПА-н туг Әәдрхнә мүҗин Хүүвин элчнрт бәрүлҗ өггдв, эдн Әрәсән Өмн үзгин парламентсин ниицәнә дарани харһлтыг давулх болв.

ДООҖАН Наталья

Видео