Мана таңһч – дииләчнрин тоод

Сегодня, 13:01 | Общество, Таңһчин зәңгс, Зіњг

Шидр Москва балһснд Әрәсән тосхлтын болн жилищн-коммунальн эдл-ахун министерств «Төрскн – энтн цергллһн мөн. Сән чинртә гер-бүүр болн көлгн-күчнә таал» гидг керг-үүлдвр давулв. Терүнд һазрин делгрлтин төсвсин Цугәрәсән марһана дииләчнриг ачлв. Марһана бүрдәмҗин багиг толһалдг Әрәсән тосхлтын болн ЖКХ-н министрин негдгч дарук Александр Ломакин дииләчнрт ачлвринь бәрүлҗ өгв.
Хальмг Таңһч түрүн болҗ давулгдсн марһана дииләчнрин тоод орснь темдгтә болв. Таңһчин тосхлтын, көлгн-күчнә болн хаалһин эдл-ахун министрин үүл дааҗадг Шахана Андрей тәәз деер һарад, марһана дииләчин диплом авв. «Җирһлин таал ясруллһн» гидг келн-улсин төсвин «Гер-бүүр» гидг көтлврин йовудт регионмудт аһу ик көдлмш күцәгдҗәнә. Әрәсән Президент Владимир Путин орн-нутгин тосхлтын министерствд болн регионмудын толһачнрт гер-бүүрин саң шинрүллһнә болн иргнмүдин төлә сән кец-таал тогталһна туст даалһвр өгсмн. Эн көтлвр балһсдт сән таал тогталһнд шаңһа мөңг, һазриг олзта-орутаһар олзллһнд, регионмудын болн муниципальн бүрдәцсин хазна оруһин әңг икдүллһнд туслна.
Хальмг Таңһчин залвр һазрин делгрлтин төсвсин йовудт селәдт болн балһсдт сән кец-таал тогталһна көтлврмүд күцәлһнд ик оньг тусхана. Таңһчин һардвр гермүд тосхгдҗадг һазрт усна турвас углҗ тәвлһнә төр хаһллһиг чинртәд тоолна. Тиигәд, орн-нутгин марһанд диилвр бәрсн төсвлә ирлцҗ, хотл балһснд Ленинә нертә уульнцд 2028 җил күртл «Изумрудный» районд хойр давхрта хөрн гер тосхгдхмн. Түрүн дөрвн гер эн җилин чилгч күртл эдлврт орулгдх зөвтә, ода деерән тенд сурвлҗс, гермүд хоорнд хаалһс тосхгдсн бәәнә. Тер мет эн шин район күртл 1,2 дууна хату девскртә хаалһ тосхгдхмн, эн кергт орн-нутгин хазнас мөңгн йилһгдв.

Мана зәңгч

Видео