Хамгин сән дууч йилһгдх

Сегодня, 12:18 | Общество, Таңһчин зәңгс, Зіњг, Сойл

«Голос Калмыкии - 2026» гидг регионмуд хоорндк дууна марһан дарани кемдән билгтә улсиг цуглулҗана. Чонкушова Петрин нертә билг-эрдмин колледж XII марһанд белдвр эклҗәхин тускар зарлҗана.
Эн марһан таңһчин көгҗмин үүлдврт ик чинртә йовдл болна. Билгтә баһчудыг йилһҗ авх арһ учрна.
«Хальмг Таңһчин сән гисн дууч» гидг нер зүүнә гисн ямаран тоомсрта йовдл гиһит! Баһчуд, нань чигн билгтнр адһтн! Марһанд орлцх улс эрлһән экләд орулҗ өгчәнә.
Марһана көтлврин йовудт соньн керг-үүлдврмүд болхмн. Дууна марһанд орлцад, билгтнр мергҗлттә көгҗмчнр, багшнр болн нертә дуучнр орлцсн «төгрг ширән» сүүрт көгҗмин медрлин олн халхар күүндвр болхмн. Аштнь билгәрн ончрсн дуучнрин ик концерт олн улсиг цуглулхмн.
Шишлң эрдм дассн дуучнр болн эврә сән дурар дуулдг улс чигн марһанд орлцҗ чадҗана. Көгҗмин болн билг-эрдмин сурһульмудын сурһульчнр, билг-эрдмин колледжин болн ик сурһулин оютнр чигн марһанд орлцхмн. Насна кемҗәһәрн болхла, тавта – долата күүкд-көвүдәс авн дуулдг улс цугтан марһлдҗ чадхмн.
Эстрадн, улсин болн академическ дууна халхар марһан болхмн. Онц дуучнр, хойр эс гиҗ һурвн дууч хамдан дуулҗ билгән үзүлҗ чадҗана. Дууна ансамбльла хамдан чигн дуулҗ болхмн. Марһанд орлцх эрлһән үкр сарин 9 күртл орулх кергтә.
Марһан 2026 җилин үкр сарин 13-14-д Элстд Чонкуша Петрин нертә билг-эрдмин колледжд болхмн. Марһанд орлцх улс ниигмин сүлҗәнд эрлһән орулҗ чадҗана.
Марһана йовудт үкр сарин 14-д «төгрг ширән» сүүр болхмн. Терүнд орлцсн багшнр болн нань чигн орлцачнр иткл цаас авхмн. «Төгрг ширән» сүүрт орлцх саната улс эртәснь эн хайгар эрлһән орулх зөвтә: https://forms.yandex.ru/u/6ac4e35750569039d69908e0/.
Сурврмуд учрсн цагт цәәлһвр кергтә болхла, бүрдәмҗин әңгин тойгар җиңнүлтн: 8 (937) 891 42 20, Николай Арсенов тана сурврмудт цәәлһвр өгхмн.
Хамгин билгтә дуучнриг цуглулх марһан күцәмҗтә болтха!
ҖИРҺЛИН Кермн

Видео