Икхурла Бодь суврһс

Сегодня, 12:29 | Общество, Таңһчин зәңгс, Зіњг, Бурхн-шаҗна төрәр

Хулһн сарин 11-д Сарпан района Аршан Зелмн селәнд өргмҗтә байрин керг-үүлдвр болв. Энд ясврин хөөн Бодь суврһс секгдв. Ик Бодь суврһн икхурла арвнд, хойр бичкнь ламнр Баля гелңд болн Бичкн Камбд нерәдгдҗ босхгдсмн.
Аршанзелмнәхн 1991 җилд икхурла арвна ламнрин санлд нерәдҗ, Бодь суврһс босхсн билә. Тиигхд эдн мана таңһчд түрүн болҗ босхгдсн суврһс бәәсмн. Җилмүд давад, суврһс хуучрад ирв. Тегәд Хальмг Таңһчин Улсин Хуралын (Парламентин) депутат, «Ик хурл» шаҗна олна бүрдәцин ахлач Цевгә Григорий болн арһлач Манҗин Виталий Бодь суврһсин ясвр келһнә седвәр татсн болдг. Селәнә бәәрн улс эднә седвәриг дөңнәд, эн әрүн чинртә кергт демән күргв.
Шевнр һазрт босхгдсн Бодь суврһсин өөр давулгдсн ик мөргүлд икхурла арвна улс оларн цуглрв. Терүнә хөөн Аршан Зелмн селәнд байрин керг-үүлдвр болв. Энд болсн хотна нәәрт икхурла арвна йисн ишкә герт ирсн гиичнрән өвкнриннь авъясар тооһад һарһв. Бичкдүдин «Цагда» болн Садовое селәнә сойлын Герин «Славянка» ансамбльмудла хамдан нер һарсн «Бамб цецг» ду-бииһин ансамбль тәәз деер һарад, билг-эрдмәрн әмтнә седкл байсав.
Аршанзелмнәхн арһ-чидлән негдүләд, нег һазра ламнрин болн өвкнриннь санлд нерәдҗ босхсн Бодь суврһсиг ясад шинрүлснь эдн хоорндан ниитәһәр бәәҗ, төрскн һазр-усндан эңкр улс болҗахиг иткүлв.
Мана зәңгч

Видео