«Бамб цецг» – Корейин хәләһәчнрт

Сегодня, 12:17 | Общество, Таңһчин зәңгс, Зіњг, Сойл

Корей Улсин Демократическ Республикд болсн «Мөрн сарин хавр» гидг нертә иньгллтин байрт Хальмг Таңһчин «Бамб цецг» дууна болн бииһин ансамбль орлцҗ, билг-эрдмән үзүлв.
Әрәсән болн КНДР-ин хоорндк залһлдан җил ирвәс батрад йовна. Тер залһлдаг улм батллһнд сойлын халхин харһлтс ик чинр зүүнә. «Мөрн сарин хавр» нерәдлһтә байрин ик керг-үүлдвр 1982 җиләс авн бүрдәгддг болсмн. Делкән орн-нутгудын сойлын болн билг-эрдмин көдләчнрин хоорнд нөкцлтин залһлда батруллһна, үүдәгч коллективсәрн сольлцлһна, иньгллтин ул деер хамцу үүлдх күслтәһәр эннь күцәгдҗәнә. Орн-нутгин булң болһнас коллективс болн онц артистнр тер ик керг-үүлдврт орлцна.
Корейин хәләһәчнрт Әрәсән олн келн-улсин билг-эрдмлә таньлдх таал учрҗана, Әрәсән әмтн чигн Корейин артистнрин билг-эрдмлә бас таньлдна. Сойлын тиим сольлцан улсин хоорндк залһлдаг батлна. Тегәд эн җилин хаврин ик байрт Хальмгин дууна болн бииһин «Бамб цецг» ансамбль билг-эрдмән үзүлснь тер.
Әрәсән Федерацин сойлын министр Ольга Любимован келсәр, «КНДР-т болдг наадм сән авъяст тохрад, хойр келн улсин иньгллтин болн ниицлтин йоста сән үлгүр болҗана. Җил болһн эн наадмд Әрәсән олн коллективс орлцна. Эннь ик иргчтә мана нөкцлтин ул тогтаҗахнь лавта».
Эн җилин «Мөрн сарин хавр» корей улсин нер туурсн толһач Ким Ир Сена 114-ч җилин өөнд нерәдгдв.
Хойр орн-нутгин сойлын байрт орлцсн үүдәгч коллективс корейин хәләһәчнриг Әрәсән регион болһна билг-эрдмлә таньлдулв. Келн-улс болһна көгҗм, ду болн би хәләһәчнрин оньг авлв.
Эн җилин мөрн сарин байрт белдәд, кесг коллективс корей келәр ду дуулв. Иигәд Әрәсән Федерацин Келн-улсин гвардин дууна болн бииһин ансамбль эврә көтлвртән «Үр Ким Ир Сена туск ду» орулв. Ингушеть Республикин ачта артист Григорий Яковлев эн ду дуулҗ концертән эклв. Пятницкийин нертә дууна коллектив бас корей улсин дуд дуулна. Давсн җилд Пхеньянд болсн концертд чигн эдн эн хойр ду дуулсиг хәләһәчнр икәр таассн билә. Viva баг чигн корей улсин ду белдҗ, бәәрн хәләһәчнриг соньмсулв.
Хальмг коллектив бас эн байрт белдсмн. «Бамб цецг» ансамблин дуучнрин һардач, Хальмг Таңһчин ачта артистк Баттөмрин Майян келсәр, үүдәгч коллектив болһн наадмд орлцхар белднә. Талдан орн-нутгт билгән үзүлснь нег үлү чинртә йовдл болна. Делкән олн келн-улсин сойлла таньлдх таал учрҗахнь чигн темдгтә. «Бамб цецгин» дууна баг корей улсин ду дуулснь цугтад таасгдв.
Делкән 20 орн-нутгин коллективс орлцсн сойлын ик байрт «Бамб цецг» ансамбль хальмг улсин билг-эрдмән үзүлсн йовдл ик бахмҗта болв.
ХӨӨЧИН Галина

Видео