Шар шаҗна клуб бүрдәгдв

Сегодня, 13:02 | Общество, Таңһчин зәңгс, Зіњг

Элстд Энткгин сойлын Өдрмүдин йовудт РАН-а Хальмг номин төвд шар шаҗна нарт-делкән клубин түрүн сүүр болв. Хальмг Таңһчин Толһач Хаска Бату, залврин Ахлачин негдгч дарук Цернә Эрднь, номтнр, арһлачнр болн талдан гиичнр терүнд орлцв.
Тодлхд, нидн Элстд шар шаҗна нарт-делкән хург давуллһна йовудт арһлачнр иим клуб бүрдәлһнә седвәр татсн билә. Кергән делгрүлҗәдг арһлачнриг негдүләд, шар шаҗна әрүн тоотыг көдлмштән олзллһн эн клубин һол күслнь болна.
Түрүн авгтан шар шаҗн болн экономик салу хойр халх болҗ медгднә. Зуг эннь хаҗһр тоолвр гиҗ селвлцәнд орлцачнр темдглв. Шар шаҗна әрүн тоот экономиклә батар залһлдата болҗахин тускар клубд орлцачнр келв.
Хальмгин, Бурятин, Энткгин, Китдын, Шри-Ланкан, Японя болн Москва, Калининград балһсдын арһлачнр клубин ханьд орв. Тер мет шар шаҗна сүзгтнрин төв заллтын һардач Йонтен Гевш эн кергиг бас дөңнҗәхән медүлв.
Сүүрин йовудт шар шаҗна нарт-делкән клубин ахлачд Җимбинә Константин батлгдв.
– Мана таңһчин арһлачнрин төлә эн керг туста болхд иткҗәнәв. Талдан орн-нутгудын болн регионмудын үүрмүдин дамшлтла таньлдад, тер мет эврә дамшлтарн хувалцдг таал учрхмн. Клубин ахлач Константин Джоржовичд болн энүнә багд ханлтан өргҗ, цаһан хаалһ дурдҗанав, – гиҗ Хаска Бату темдглв.
ОЛЬДАН Цаһан

Видео