Йосна болн улсин хоорндк залһлдана тускар

Сегодня, 12:29 | Общество, Таңһчин зәңгс, Зіњг

Хальмг Таңһчин Олна палатын гешүд Әрәсән шар шаҗна сүзгтнрин Оюни төв заллтын ахлач гевш Йонтенла харһв. Чинртә эн харһлт А.Амр-Санана нертә Келн-улсин дегтрин саңд болв. Бурхн Багшин ном делгрүлҗ тархалһнд сүл цагт Әрәсән нилч өсчәхин тускар харһлтд күүндвр болв. Делкәд ик гисн шаҗна негнь болҗадг Бурхн Багшин номиг олнд медүллһнд Хальмг Таңһчд давсн җилд болсн шаҗна үүлдәчнрин нарт-делкән һурвдгч цуглран ик чинр зүүснь күүндврин йовудт темдглгдв.
Олна палатын ахлач Мучан Баатр харһлтыг секәд, күндтә гевш Йонтенд үг өгв. Әрәсән Олна палатын гешүн болад, кеҗ-күцәҗ йовсн көдлмшин тускар эн келҗ өгв. Олн-әмтнә седвәриг йоснд күргҗ медүллһнд Олна палатын элчнр баһ биш көдлмш кеҗәхиг эн заав. Чинртә эн бүрдәцд олн зүсн төрәр комиссьмүд үүлднә. Эврә комиссин үүлдврт орлцсн деерән Олна палатын гешүд олыг соньмсулдг төрәр кегддг шинҗллтд шинҗләчнр болҗ орлцна. Шаңһа чинртә төсвсиг бәәдл-җирһлд тохрахас урд Олна палатын гешүдин тоолвр чигн оньгт авгдна. Йосн олнла залһлда бәрлһнә хамгин сән дамшлт Әрәсәд тогтсиг талдан кесг һазрар йовад, эн халхин үүлдврлә таньлдсн цагтан гевш Йонтен медҗ авв. Тер дамшлтыг гевш таңһчин Олна палатын гешүдт цәәлһҗ өгв.
Энүнә олна үүлдврин тускар палатын гешүд тоолврарн хувалцҗ, Әрәсән Президентин медлд үүлддг олн шаҗна хоорндк хүүвин гешүн болсн үүлднь улм өөдән күцәмҗ дурдв. Әрәсән Олна палатд Хальмгас шиидгдх кандидат Җимбинә Константин мөн. Гевш Йонтен бурхн-шаҗна үүлдвриг олн келн-улс дунд делгрүллһнд ач-тусан күргҗ йовхинь темдглв. Хальмгт болсн шар шаҗна хург таңһчин чинриг Әрәсән болн делкән кемҗәнд өргҗ медүлсн йовдл цуг хальмгудт бахмҗта. Давсн зун җилин дөчдгч җилмүдәс нааран бурхн-шаҗна Әрәсән бүрдәцд нег чигн хальмг лам орҗасн уга билә. Тегәд Әрәсән сүзгтнрин оюни төв заллтыг хальмг гевш толһалҗахнь маднд ик байр-бахмҗ үүдәнә. Гевш Йонтен эн үүлд орсн цагас авн Бурхн Багшин номд шүтдг орн-нутгудла Әрәсән залһлдан улм батрв. Бурхн Багшин номиг олнд дунд цәәлһҗ тархалһн шин девсңд һарв. Эн шаҗна нилч улсин үүлдврин цуг халхст туслҗахиг саяд әмтн медҗ авчана. Цуг эннь хальмг шаҗна үүлдәч гевш Йонтена чигн ач-тус болҗахнь лавта.
Олна палатд болсн күүндврин йовудт таңһчин цаарандк делгрлтин туст олн селвгүд келгдв, цуг тер тоот диглҗ хәләгдәд, Олна палатын үүлдврин зурад орулгдх болв.

УШКАНА Сувсн

Видео