Дәәнә ветеранд золһҗ одв

Сегодня, 12:53 | Общество, Таңһчин зәңгс, Зіњг

Давсн долан хонгин йовудт мана орн-нутгт Төрскән харсгч Алдр дәәнә 81 җилин өөн өргмҗтәһәр темдглгдв.Эн өдрмүдт санлын митингүд, дәәнә ветеранмудла харһлтс, олна нәр-наадд бүрдәгдсн болдг. Нег үлү хол дөчдгч җилмүдт эврә һазран һалзу хортнас сулдхад, догшн дәәлдәнә йовудт хооран цухрлго өмәрән зүткҗ, дәәнә цагин күнд-күчр тоотыг дааҗ һарсн ветеранмудт ханлтан медүлҗ тевчҗ күндлнәч. Зуг һундл төрхәс,җил ирвәс Төрскән харсгч Алдр дәәнд орлцачнрин то баһрад йовна, тедү мет эндр әмд-менд бәәдг зөвәр ик наста ветеранмудла болсн харһлтсиг нег үлү өөдәнәр үнлнәч.
Мана хотл балһснд бәәдг ода чигн шулун-шудрмг зу һарсн ветеран Петр Леонтьевиг ода кен эс меднә, энд-тенд болсн харһлтст орлцҗахнь,уульнцд йовсн ик-баһ угалань күүндҗәхнь чигн үзгднә. Келхд, хөн сарин 4-д Яшкулин района Хулхтын наад бийд босхгдсн бумблвин шидр болсн санлын керг-үүлдврт эн көгшә орлцснь бас темдгтә болв,нег үлү дорас өсч йовдг үйнрт төрскнч сурһмҗ өглһнә халхар эннь ик чинр зүүҗәхнь маһд уга юмн.
Алдр Диилврин сән Өдр угтҗ Хальмг Таңһчар үүлдҗәдг зарһин приставмудын цергллтин Заллтын көдләчнр болн баһчудын хүүвин гешүд Төрскән харсгч Алдр дәәнә ветеран Петр Леонтьевич Леонтьевд золһҗ одад йөрәв (зургт). Петр Леонтьевичин өвәрц җирһлнь өдгә цагт кенднь чигн үлгүр-үзмҗ болхнь лавта гиҗ сангдна. II девсңгин Төрскән харсгч дәәнә орденәр ачлгдсн ветеран «Багратион» тууҗлгч керг-үүлдврт орлцач, күч-көлснә ветеран, Хальмг Таңһчин күндтә иргн болна. Ик наста болсн бийнь көгшә олна керг-үүлдврмүдт шунмһа кевәр орлцҗ, дәәнә цага тодлврмударн баһчудла хувалцсн деерән сүв-селвгән,заавран өгдг төләднь энүнлә болсн харһлтст баһ наста улс оларн ирдгнь бас мел үнн юмн.
Зарһин приставмудыг дәәнә ветеран гертән бүләнәр тосад, седклин күр-күүндврин йовудт дәәнә цагин туурмҗта йовдлмудан сергәҗ, тодлврмудтан авлгдв. Төрскән харсгч Алдр дәәнә кемд Петр Леонтьевич Белоруссиг болн Литваг хортнас сулдхад, Прибалтикиг болн Польш орн-нутгиг давҗ һарад, ик түрү-зүдү үзсән чигн тодлв. Энүнә келврмүд залу-зөргин, төрскнч седклин йоста үлгүр болҗахнь лавтаһар медгдҗәнә. Бийнь үгтә-күүртә, кенләнь чигн ээлтә ветеран ирсн гиичнрт дәәнә цагин дууһан дуулҗ өгснь чигн бахмҗта болв.
Дәәнә цагт баатр йовдл һарһад, Алдр Диилвр делдсн ик ачта көгшәд зарһин приставмуд хаврин цецгүд болн үнтә белгән бәрүлҗ өгв. Петр Леонтьевич таңһчин зарһин приставмудт зүркни ханлтан өргәд, олна төлә кеҗ-күцәҗәдг амр биш көдлмштнь цуг халхин күцәмҗ дурдв.
Хальмг Таңһчар үүлдҗәдг зарһин приставмудын цергллтин Заллтын һардвр дәәнә ветеранмудт,тылд көдлсн цуг улст болн Хальмгин олн-әмтнд хөв- кишг, байр-бахмҗ, дән-даҗг уга эвин бәәдл дурдв. Мана келн-улсин күчн цааранднь чигн Әрәсән ниицлтиг батрулҗ йовтха, 81 җил хооран диилвр бәрхд туслсн орн-нутгин цуг келн-улсин авъясмуд оньдинд хадһлгдҗ йовтха, мана баатрмудын залу-зөрмг йовдлын санлнь мөңк болтха, ах наста улсиг күндллһн цуг үйнриг хамцулҗадг хамгин үнтә тоот болтха, гиҗ зарһин приставмуд ачта ветерана нернд олнд йөрәлин үгән нерәдснь чигн көгшән седклинь йосндан байрлулв.

Шагҗин Любовь

Видео