Эн җил Әрәсән пошт 30 җилин өөнән темдглв. Ончта өөн угтҗ, Хальмг Таңһчар үүлддг поштын цергллтин заллт көдләчнр дунд эрдмин марһа давулҗ, сән гисн мергҗлтнриг йилһҗ авв. Тер марһанд Яшкулин поштын әңгин көдләчнр нүүрлгч орм эзлҗ, ик күцәмҗ бәрҗ ончрв. Тедн дунд Үстин района Үст селәнә поштын әңгин һардач Мөңкән Цаһан заагдсн билә.

Улан-Удэ балһснд ноха сарин 12-ас авн 14 күртл шар шаҗна хойрдгч нарт-делкән хург болв. «Традиционный буддизм и вызовы современности» гидг нертәһәр делкән ик хург давв. Бурятин хотл балһснд 15 орн-нутгин элчнр цуглрҗ ирв. Зааҗ келхлә, Әрәсәд Таиланд Королевствин элч Сасиват Вонгсинсават болн Әрәсәд Шри-Ланкан элч Пакир Амза хургт ирҗ орлцв. Бурятин Толһач Алексей Цыденов күндтә гиичнриг тосч авв.

Таңһчин Толһач Хаска Бату Хальмгин Шаҗн Лам Тензин Чойдакла харһҗ 2025 җилд болх шар шаҗна нарт-делкән чуулһна тускар күүндв.

Хальмг Таңһчин Толһач Хаска Бату Әрәсән Хүүвин Ахлач Валентина Матвиенкола харһв.

Шидр Элстд Хальмг Таңһчин Толһачин медлд үүлддг шалтгта улсин керг-төрин хүүвин дарани сүүр болв. Терүг Хальмг Таңһчин Улсин Хуралд (Парламентд) таңһчин Толһачин элч Манҗин Араш һардҗ давулв. Сүүрт таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, күцәгч йосна болн эрмдгтә улсин олна бүрдәцсин элчнр орлцв. Хүүвин гешүд һурвн төр хәләв, эннь шалтгта бичкдүдиг асрҗадг өрк-бүлмүдиг дөңнлһнә туст социальн теткврин бүрдәцсин үүлдврин, «Сурһуль-эрдм» гидг келн-улсин төсвин медлд коррекционн сурһульмудын үүлдвр бүрдәлһнә, «Төрскән харсачнр» саңгин региональн әңг цергә шишлң керг-үүлдврт орлцачнрт дөң күрглһнә төрмүд болв.

Одахн Москван ВДНХ-д давҗадг «Әрәсә» һәәхүлин йовудт «Улсин фронт. Цугнь Диилврин төлә» буйнч седклин саңгин көдлмшин хойр җилд нерәдсн керг-үүлдвр болв. Тенд ончрсн орн-нутгин волонтермудыг ачлв.

«Демографь» гидг келн-улсин төсвин «Көдлмш олҗ авхд туслһн» гидг көтлврин медлд көдлмш уга улс шаңһас демин мөңг авад, эврә керг бүтәҗ чадна. Яшкуль селәнд бәәдг Абуша Баатр тиим кевәр эврә кергән бүрдәҗ, өдмг болһдг болв. Ода энүнә болһсн өдмгиг бәәрн лавкст хулдҗ авч болхмн.

Хальмг Таңһчин социальн делгрлтин, күч-көлснә болн көдлмшәр тетклһнә министерств күч-көлс харлһна сән гисн мергҗлтиг йилһҗ авв. Марһана ашар «Криосервис» гидг ООО-н мергҗлт Мөңкән Василий диилвр бәрв. Лаганя районд Әрәсән МЧС-ин заллтын әңгин элч Оскан Александр болн Хар Һазра района Артезиан селәнә дунд сурһулин мергҗлт Калян Жансая дииләчнрин тоод бас орв.

Олег болн Цаһан Цереновихн хөрн һар җил хооран ханьцад, һурвн үртә эк-эцк болв. Эн җил эдн «Җилин сән гисн өрк-бүл» гидг марһанд орлцад, өвкнриннь авъяс хадһлдг өрк-бүлмүд дунд диилвр бәрв. Эн күцәмҗ өрк-бүлиг улм батрулад, эднд ик урмд өгв, элгн-саднднь болхла байр-бахмҗ үүдәв.

Сүл җилмүдин эргцд мана таңһчд сурһуль-эрдмин кесг арвад бүрдәцд бат ясвр күцәгдәд, дорас өсч йовдг үйнрин төлә цуг таал тогтагдҗана. Бичкдүд мана иргч, тегәд тедн өдгә цагин некврлә ирлцҗәдг бәәрнд сән медрл, чик сурһмҗ авч өсх зөвтә.