Нүүрлгч мергҗлт болад ачлгдв

20-08-2024, 10:21 | Общество, Таңһчин зәңгс, Зіњг

Эн җил Әрәсән пошт 30 җилин өөнән темдглв. Ончта өөн угтҗ, Хальмг Таңһчар үүлддг поштын цергллтин заллт көдләчнр дунд эрдмин марһа давулҗ, сән гисн мергҗлтнриг йилһҗ авв. Тер марһанд Яшкулин поштын әңгин көдләчнр нүүрлгч орм эзлҗ, ик күцәмҗ бәрҗ ончрв. Тедн дунд Үстин района Үст селәнә поштын әңгин һардач Мөңкән Цаһан заагдсн билә.

Цаһан Викторовна селәнә поштд арвн җилдән көдлҗәнә. Урднь энд көдлҗәсн Цекән Надежда ачта амрлһнд һархларн, энүг бийиннь ормд үлдәсмн. Күүкд күн номһн болн әмтнлә тевчңгү, бод-бод гисн авцта болна, тегәд Надежда Цебековна мел иим күн энд көдлҗ чадх гиҗ тоолсмн. Эн җилмүдин эргцд Цаһан Викторовна көдлмшин халхар байн дамшлт хоршаҗ, кергән даавртаһар күцәҗ, бәәрн әмтнд сән чинртә туслмҗ күргҗ көдлҗәнә. Әрәсән поштын өөнд нерәдгдсн марһанд эн Яшкулин поштын көдләчнрин багин ханьд орад, даалһврмудыг сәәнәр күцәһәд, 2-ч орм эзлсмн. Таңһчин райодын болн Элст балһсна поштын көдләчнр дунд сән күцәмҗ бәрснь эн кергән меддг болн дамшлтта мергҗлт болҗахиг иткүлв.
- Мана хамцу баг таңһчин марһанд ончрад, регионмуд хоорндк девсңд бас сән күцәмҗ бәрснь ик бахмҗта йовдл болв. Өдр-бүрин йовудт бидн көдлмшән күцәһәд, нег-негндән ямр нег төрмүд хаһлхд дөң болнавидн. Яшкулин поштын һардвр селәдт үүлддг әңгүдин үүлдвр әмтнд туста болхин, күргҗәдг туслмҗ сән чинртә болхин төлә маднд сүв-севлг өгч, учрсн төрмүдиг дарунь хаһлна. Тер төләд мана баг таңһчин марһанд күцәмҗ бәрв гиҗ санҗанав. Поштын заллт долан хонгт һурв дәкҗ бичгүд, илгәвр, барин һарцс болн эд-тавр авч ирнә. Бидн барин һарцс әмтнд гертнь күргнәвидн, коммунальн туслмҗин мөңг орулҗ авнавидн, пенсь болн талдан социальн демин мөңгиг түгәҗ өгнәвидн, олн зүсн эд-тавр хулднавидн. Зәрм улс дассарн поштд ирҗ пенсән авхар седнә, наадкснь гертнь күргҗ өгхиг сурна. Урднь өрк-бүл болһн олн зүсн барин һарц бичүлҗ авдг бәәсн болхла, ода хая нег газет эс гиҗ седкүл авна. Җил ирвәс барт бичгдлһнә үн өсәд йовна, тегәд газет авдг улсин то баһрв. Ода әмтн лавкд хулд кехин ормд эд-тавриг бичүлҗ авна, тегәд терүгинь бас өгнәвидн. Көдлмш күнд биш, болв ик дааврта болна, тегәд цугинь дигтә-даратаһар күцәх кергтә, - гиҗ Цаһан Викторовна келнә.
Мөңкән Цаһан ода поштд һанцарн көдлҗәнә. Энүнлә урднь хамдан көдлҗәсн Ванга Паликанова удл уга көдлмштән һархмн, эн үрән асрлһна амрлһнд бәәнә. Эн селәнә әмтнд барин һарцс болн бичгүд гертнь күргдг болхмн. Селәнә поштд кех-күцәх көдлмш баһ биш, тегәд хойр күн көдлхлә, невчк амр болхнь маһд уга. Цаһан Викторовна дамшлтта мергҗлт болад, баахн көдләчд цугинь зааҗ дасхв, тегәд эдн хамдан ниитә кевәр көдлнә. Поштын әңгүр орҗ ирсн улст эдн дарунь туслмҗ күргәд, ямр нег төрәр цәәлһвр өгәд, бичг йовулхд, эд-тавр хулдҗ авхд дөң болна.
Сар хооран поштын көдләчнрин байрин хургт олн җилдән көдлҗ йовдг улсин ач-тус темдглҗ, өөдән ачлвр бәрүлҗ өгсн билә. Көдлмшән үнн-чик седклтәһәр болн ик даавртаһар күцәдг төләдән Үстин поштын әңгин һардач Мөңкән Цаһан Хальмг Таңһчин то-дигин делгрлтин министерствин Ханлтын бичгәр ачлгдв. Авальнь болн күүкнь энүнлә байринь хувалцҗ, улм ик күцәмҗ бәрхинь дурдв. Герин эзнь малын хошт көдлҗәнә, ор һанцхн күүкнь Элстд Хальмг Таңһчар үүлддг Әрәсән хазна заллтын мергҗлт болҗ үүлдҗәнә. Көдлмшин хөөн күүкд күн үүл бәрҗ, ке-сәәхн хувц уйҗ эс гиҗ өлгҗ цаган давулҗ амрхдан дурта.

ДООҖАН Наталья
ЗУРГТ: Үст селәнә поштын әңгин һардач Мөңкән Цаһан

Видео