Урҗ өдр Элстд «Эхо» бумблвин өөр «Негдсн Әрәсән» «Молодая гвардия» хальмг региональн әңгин нүүрләчнр Севастополь балһснд болн Дагестанд болсн әәмшгтә йовдлмудт әмнәсн хаһцсн улсин санлынь тевчҗ күндллһнә керг-үүлдвр давулв.

Шидр Яшалтан района «Лесная сказка» лагерин ул деер «Зарница» наадна ашинь диглв. «Движение первых» җисәнә нилчәр наадн өдгә цагин некврлә ирлцҗ давулгдв.

Сүл цагт мана орн-нутгт амр биш бәәдл тогтснас иштә хулд-гүүлгәнә әәмшг уга бәәдлд онц оньг тусхагдҗана. Кеҗ һарһсн эд-таврар, эдл-уушар нег һазра улсан теткхин төлә ик көдлмш күцәгдҗәнә. Нег үлү селәнә эдл-ахун арһлачнр эн төр хаһллһнд бас ик тәвцән орулҗ йовна, гиҗ темдглх кергтә.

Одахн Элст балһсна дорд үзгт бәәдг стадионд таңһчин зөв-йос харлһна бүрдәцсин дунд болсн спартакиадт таңһчин приставмудын заллтын көдләчнр орлцв. Спортивн керг-үүлдврт цуһар чидлән сөрв.

Сүл арвн җилин туршарт таңһчин приставмуд цусан өгч, донормудын җисәг дөңнҗ йовна. Эн йовдл сән авъяст тохрв.

Давсн җиләс авн Хальмг Таңһчин эмнлһсин элчнр Антрацитовск районд одад, бәәрн улсин эрүл-менд шинҗллһнә, эднд түрүн дөң күрглһнә керг-үүлдврмүд күцәҗәнә.

Антрацитовск района социальн бүрдәцсин болн әмтнә гермүд яслһна көдлмш күцәҗәдг деерән мана таңһч шин тосхлтс эдлврт оруллна керг күцәҗәнә.

Мана таңһч болн Антрацитовск район хоорнд батлгдсн нөкцлтин медлд сурһуль-эрдмин, социальн теткврин бүрдәцслә залһлдан бас делгрҗәнә. Таңһчин багшнр болн социальн көдләчнр дамшлтарн хувалцҗ, дорас өсч йовх бичкдүдин зуни амрлһ бүрдәлһнә, баһ тетквртә болн җирһлин күнд таалд туссн улст, медәтнрт дөң күрглһнә халхар хамцу үүлдҗәнә.

Хальмг Таңһчин жилищн-коммунальн эдл-ахун болн энергетикин министерствин медлд үүлддг бүрдәцс давсн җиләс авн Антрацитовск районд дөң-тусан күргҗ, олн давхрта гермүдин ора яслһна, намрин-үвлин кемд гермүдиг дулаһар тетклһнд белдлһнә, усар тетклһнә сурвлҗ шинрүллһнә көдлмш күцәҗәнә.

Дунд сурһулян төгсәсн күүкд-көвүд шүүврән өгәд, терүнә ашлвр ямаран болхиг күләҗ, тааста эрдм шүүҗ авч цааранднь альд сурхин тускар ухалҗана. ЕГЭ өглһнә кемин эклцд шүүврән өгсн сурһульчнр кедү балл хоршаҗ авсан медсн бәәнә. Шидр Ямало-Ненецк автономн округин Надымск района Пангодинск сурһуль-эрдмин төвин сурһульч Шанхура Саяна утх зокъялын шүүвриг йилһән сәәнәр өгәд, 100 балл хоршасна туск зәңг һарв. Күүкн дунд сурһулиг алтн медальтаһар төгсәв, эн олна бәәдл-җирһлд болн марһаст шунмһаһар орлцдг бәәсмн. Ямалын губернатор Дмитрий Артюховин седвәрәр шүүврән йилһән сәәнәр төгсәсн сурһульчнр 100 миңһн арслңга мөрәһәр ачлгдна. Тегәд хальмг күүкн нерән һарһад, бас эн мөрә авхмн.