Хальмг күүкн нерән дуудулв

Дунд сурһулян төгсәсн күүкд-көвүд шүүврән өгәд, терүнә ашлвр ямаран болхиг күләҗ, тааста эрдм шүүҗ авч цааранднь альд сурхин тускар ухалҗана. ЕГЭ өглһнә кемин эклцд шүүврән өгсн сурһульчнр кедү балл хоршаҗ авсан медсн бәәнә. Шидр Ямало-Ненецк автономн округин Надымск района Пангодинск сурһуль-эрдмин төвин сурһульч Шанхура Саяна утх зокъялын шүүвриг йилһән сәәнәр өгәд, 100 балл хоршасна туск зәңг һарв. Күүкн дунд сурһулиг алтн медальтаһар төгсәв, эн олна бәәдл-җирһлд болн марһаст шунмһаһар орлцдг бәәсмн. Ямалын губернатор Дмитрий Артюховин седвәрәр шүүврән йилһән сәәнәр төгсәсн сурһульчнр 100 миңһн арслңга мөрәһәр ачлгдна. Тегәд хальмг күүкн нерән һарһад, бас эн мөрә авхмн.

Бидн Саяна күүкнлә күүндәд, шүүврт белдхд кен дөң болсна, цааранднь ямаран ик сурһульд сурхар зуралҗахин тускар келҗ өгхинь сурвидн. Күүкнә келсәр, эднә өрк-бүл 2016 җиләс авн Пангоды селәнд бәәнә. Экнь эрүл-менд харлһна көдләч болна, эцкнь харулчар көдлҗәнә. Һурвн үртә өрк-бүл зуни кем эклхлә Хальмг Таңһчурн адһна, энд олн элгн-саднлаһан харһҗ, цаган сергмҗтәһәр давулҗ амрна. Төрскн һазрасн холд йовдг болв чигн эдн өвкнриннь авъясар бәәҗ, келн-улсин сән өдрмүдиг энд бәәдг хальмгудла хамдан тосна.
- Мана өрк-бүл Октябрьск района Хошуд селәнәс, тенд мана элгн-садн бәәнә. Эклц классмудт би тенд сурдг биләв. Нәәмн җил хооран нааран нүүҗ ирәд, энд сурдг болв. Бәәрн бичкдүдлә таньлдад, үр-иньгүд болвидн. Би бичкн Төрскнәннь тускар, хальмг улсин сойлын болн авг-бәрцин тускар үүрмүдтән келҗ өгнәв, эдн Хальмг Таңһчар соньмсҗ кесг сурвр өгнә. 7-ч класст сурчасн цагтан би утх-зокъялын олимпиадт орлцад, 1-ч орм эзлсн биләв. Тер күцәмҗ утх-зокъялар улм соньмсж хөөннь шүүвр өгх шиидвр авхд туслв. Мана багш Наталья Ильинична Четвернина утх-зокъялын кичәлмүдиг соньн кевәр давулҗ, орс болн нарт делкән бичәчнрин үүдәврмүдлә таньлдулҗ, маднд гүн медрл зааҗ өгв. Болв би эврән шүүврт бас белдҗ, немр кевәр олн зүсн эв-арһ олзлҗ медрл хоршаҗ авсн биләв. Шүүврән йилһән сәәнәр өгч 100 балл хоршаҗ авхв гиҗ санҗасн угав. Тегәд тиим сән күцәмҗ бәрснь нанд бәәтхә, багшнрт болн мана өрк-бүлд ик байр үүдәв, – гиҗ Саяна келв.
Саяна Санкт-Петербург балһсна ик сурһульд орхар зуралҗана, эн кел шинҗллһнә номин халхар үүлдх саната. Утх зокъялас нань күүкн орс болн англь келәр шүүвр өгв. Дәкәд хойр шүүврин ашнь медгдснә хөөн Саяна ик сурһульд орх эрлһән орулҗ өгхмн. Ода болхла эн амрчана, күүкн дегтр умшҗ, ямр нег соньн фильм хәләҗ сул цаган давулхдан дурта. Ик сурһульд орад, оютн болад тааста эрдмәрн сурх цагнь күүкнә җирһлин дарани девсң болхмн. Сансн санань күцҗ хаалһнь цаһан болтха! – гиҗ бидн Саянад дурдҗанавидн.
ДООҖАН Наталья