Мана эмчнрин дөң

Давсн җиләс авн Хальмг Таңһчин эмнлһсин элчнр Антрацитовск районд одад, бәәрн улсин эрүл-менд шинҗллһнә, эднд түрүн дөң күрглһнә керг-үүлдврмүд күцәҗәнә.
Тиигәд, ут тоодан 16860 күн, тер тоод 9 миңһн бичкн хальмг эмчнрт бийән үзүлҗ, эмнлһнә туст сүв-селвг авв. Багин ханьд зүркнә, нүднә, шүднә болн нань чигн эмчнр орсмн, гүн шинҗллт кехин төлә мобильн флюорограф болн маммограф олзлгдв. Хальмгин эмчнр бөдүн улсин болн бичкдүдин эрүл-мендин бәәдл шинҗлҗ, кенд ямаран эмнлһн кергтәһинь диглҗ, сүв-селвгән өгч, зәрм улст мана таңһчин эмнлһст ирҗ эмнүлгдхин туст үрвр кев.
Сүл дәкҗ мана эмчнр моһа сарин эклцәр тиигәрән одад, Антрацит балһсна бәәтхә, хол селәдт күрәд, дөңгән күргсмн. Диспансеризацд орсн улс дунд олн зүсн хуучта, зүркнә-судцна, геснә болн нань чигн гемтәнь илдкгдв. Хальмг эмчнрт бийән үзүлсн хойр күүкд күн П.Жемчуевин нертә таңһчин эмнлһнд эмнүлгдсн билә. Мана эмчнр Луганск Улсин Республикәс ирсн медәтнрт дөң болснь эднә җирһлин таалыг ясрулв. Эмнлһ авсн Лариса Ивановна Придворная болн Зинаида Александровна Овчарова хальмг көдләчнрт зүркни ханлтан өргсмн.
ДАВАН Наталья