Бидн хамдан!

Урҗ өдр Элстд «Эхо» бумблвин өөр «Негдсн Әрәсән» «Молодая гвардия» хальмг региональн әңгин нүүрләчнр Севастополь балһснд болн Дагестанд болсн әәмшгтә йовдлмудт әмнәсн хаһцсн улсин санлынь тевчҗ күндллһнә керг-үүлдвр давулв.
Баһчуд зул өргҗ зальврад, Севастополь балһсна болн Дагестана улсиг дөңнҗәхән медүлв. Тиим әәмшгтә цагла нег-негән эрк биш дөңнх кергтә. Әмнәсн хаһцсн улсин өөрхн элгн-саднлань зовлңгинь хувалцҗ, шавтсн әмтн эдгҗ, гертән шулун хәрҗ ирхиг баһчуд дурдв. Тер мет нег һазра мана баһчуд терроризмиг уга келһнә туст бас ирлцңгү керг-үүлдврмүд даңгин давулдгинь темдглх кергтә.
ОЛЬДАН Цаһан