Шин бүүртә болх

Антрацитовск района социальн бүрдәцсин болн әмтнә гермүд яслһна көдлмш күцәҗәдг деерән мана таңһч шин тосхлтс эдлврт оруллна керг күцәҗәнә.
Тиигәд, сурһуль-эрдмин 14 бүрдәцд хот-хол болһдг хораст шин болн өдгә цага кергсл углҗ тәвгдв. Антрацит балһснд архивин бәәрнд бат ясвр кеҗ сән таал тогтагдв, һар цаас келһнә бәәшң тосхгдҗана. Тер мет ода инвестормудын дөңгәр олн патьрта гер тосхлһна керг эклсн бәәнә. Тавн давхр герт удл уга балһсна улс шин бүүртә болхмн. Тосхачнр шин герин эргндк һазрт сән кец-таал тогтаҗ, бичкдүд нааддг орм бас кехәр зуралҗана.
Тиигәд, Хальмг Таңһч болн Антрацитовск район хоорнд батлгдсн нөкцлтин медлд аһу ик дөң күргҗ, бәәрн улсин җирһлин таал ясруллһна төрмүд хаһлгдҗана. Ахнр-дүүнр болсн хойр регион цааранднь чигн залһлдаһан батрулҗ, нег-негән дөңнҗ, күцәмҗтәһәр үүлдҗ, нөкцлтиг делгрүлх саната.

ДАВАН Наталья