Элвг урһц хурахар зүткҗәнә

Сүл цагт мана орн-нутгт амр биш бәәдл тогтснас иштә хулд-гүүлгәнә әәмшг уга бәәдлд онц оньг тусхагдҗана. Кеҗ һарһсн эд-таврар, эдл-уушар нег һазра улсан теткхин төлә ик көдлмш күцәгдҗәнә. Нег үлү селәнә эдл-ахун арһлачнр эн төр хаһллһнд бас ик тәвцән орулҗ йовна, гиҗ темдглх кергтә.
Эн җил хавр дулан болад, теегт буудян урһц хуралһна дааврта кем невчк эрт эклв. Ик Буурла болн Целинн райодт буудян урһц экләд хурагдҗана. Яшалтан болн Городовиковск райодт болхла, намрин ичмә хураҗана.
Эн дааврта кем ямр йовудтаһар давҗахинь медхәр шидр Ик Буурла районд одад ирвидн.
Ик Буурла района муниципальн бүрдәцин селәнә эдл-ахун заллтын һардач Цеднә Ивана келсәр, урһц хуралһна кем мөчн сарин 16-д эклв. 40230 гектар аһу һазрас буудян урһц хурагдхмн. Өдгә цагт тавн миңһн шаху аһу һазрт буудя хурагдв, дундлад келхлә нег гектар тәрәнәс 16,5 центнер буудя хурагдҗана.
Арһлач Тосуна Михаилын «Восход» крестьянск-фермерск эдл-ахуд урһц хуралһна көдлмш сән йовудтаһар давҗана. 2,5 миңһн гектар аһу һазрт урһц хуралһнд йисн комбайн болн талдан шишлң техник олзлгдҗана. Җил болһн мана теегт урһҗ авсн буудя Ростов балһсна буудян чинр шинҗлдг төвд йовулгдна. Темдглхд, хальмг буудя даңгин сән чинртә болна, гиҗ шиидвр һарһгдна.
КФХ-н һардач Тосуна Михаил хам-хоша бәәдг Сарпулин мүҗин Светлоград балһсна комбайнермудла бооца батлад, тедниг нәәмәдлнә. Тер юңгад гихлә тедн эврәннь шишлң техникән авч ирнә.
Комбайнер Виктор Курашенкон келсәр, мана таңһчд эн кесг җилдән ирҗ көдлҗәнә. Энд көдлмшин цуг таал тогтагдна. Хальмгт буудя эртәр болвсрна, тегәд энд көдләд, хөөннь гертән хәрәд, тенд буудян урһц хуралһнд бас орлцна.
Тер мет Тосуна Михаил бод мал өскчәнә. Үрдән бичкнәснь авн дааврта көдлмшт орлцулҗана.
– Бичкнәсн авн эцкм мадниг мал өсклһнд, урһц хуралһнд, малд хот белдлһнд болн талдан кесг дааврта кергт орлцулҗ, талдан кергин тускар цәәлһҗ өгнә. Тер мет селәнә эдл-ахун халхар дөңнлһнә шаңһа демиг өргнәр олзлҗ йовна. Кесг җил хооран малдан хот белдхин төлә буудя ачдг шишлң трактор хулдҗ авла, – гиҗ Церн көвүнь келнә.
Юлия күүкнәннь келсәр, эцкнь эврәннь кергән йир сәәнәр меднә. Седклән тәвҗ цугинь күцәнә болн маднла дамшлтарн даңгин хувалцна. Тер мет ачнр-зеенртән килмҗтә аав болна.
Эндр Юлия күүкнь эцкиннь даалһврар урһц хуралһна тускар фильм цокч белдҗәнә. Терүнд дааврта кемд орлцсн улс цуһар эврәннь ухан-тоолврарн болн дамшлтарн хувалцҗана. Өрүн эртәс авн асхн ора күртл Юлия көдләчнрлә хамдан теегт һарч, шачах нарнд өдрин туршт эцкиннь даалһсиг күцәҗәнә. Иргчдән фильмиг ачнр-зеенрнь хәләҗ, аавиннь көдлмшиг үнлҗ чадхмн.
Урһц хуралһна кем цаарандан давҗана. Сүл хойр җилин үлгүрәр таңһчин селәнә эдл-ахун көдләчнр элвг урһц хураҗ дәкнәс ончрхнь лавта.
КАРСАНА Евгения
Зургт: Тосуна Михаил (барун талас хойрдгчнь) комбайнермудла