Оютнрла харһв

25-04-2026, 12:18 | Общество

Б.Б.Городовиковин нертә баһчудын Герт колледжмүдин оютнр цергә шишлң керг-үүлдврин ветеран, «Баатрмуд-08» көтлврт орлцач Очр-Аран Эрдньлә харһв. Робототехникин делгрлтин болн то-дигин сурһмҗ өглһнә төрмүдәр эдн күүндв.
Хальмг Таңһчин залврин Ахлачин дарук, то-дигин делгрлтин министр Этән Алексей болн сурһуль-эрдмин элчнр харһлтд бас орлцснь темдгтә болв.
Урднь Очр-Аран Эрднь дархнчин кергән делгрүләд баһчуд дунд марһа давулдг бәәсмн. Хөөннь то-дигин эв-арһсар соньмсад, робототехникин негдлт секхәр шиидв.
– Эндр оютнрин баг көдлҗәнә. Робототехникин эрдм баһчудт таасгдна, эдн хамдан кесг марһас бүрдәһәд, цаган тустаһар давулна. Өдр ирвәс робототехникин эрдм дасхар седҗәдг арвтнрин то өсәд йовна. Колледжмүдин оютнрин дунд кесг баг бүрдәһәхәр зуралҗанавидн, – гиҗ Эрднь Владимирович келв.
Этән Алексейин темдглсәр, робототехникин эрдм эрк биш делгрх зөвтә, энүг селәнә эдл-ахун, эрүл-менд харлһна, номин болн талдан халхар олзлҗ болхмн. Арвтнр эв-дован батрулҗ, удл уга шишлң марһаст орлцхнь маһд уга. Эн туст цуг халхар дөңгән күргхвидн, гиҗ Алексей Петрович иткүлв.
БАДМИН Занда

Видео