«Зарница» наадна ашинь диглв

Шидр Яшалтан района «Лесная сказка» лагерин ул деер «Зарница» наадна ашинь диглв. «Движение первых» җисәнә нилчәр наадн өдгә цагин некврлә ирлцҗ давулгдв.
Түрүн дөң яһҗ күргдгинь, БПЛА-г яһҗ залдгинь, спортивн белдврән болн талдан олн тоот үзүлҗ, нааднд орлцачнр чидлән сөрв.
Элст балһсна, Көтчнрә, Үстин болн Яшкулин райодын хамцу баг ончрад негдгч орм эзлв. Мел эн арвтнр Аһш балһснд болх ЮФО-н марһанд Хальмг Таңһчиг элчлхмн.
– «Зарница» наад давуллһнд Җанган Чимид һардҗадг «Дәәч» төвин дамшачнр ик нилчән күргв гиҗ темдглх кергтә. Арвтнрин төлә эн һанцхн наадн биш, тер мет дааврта болн төрскнч седклтә баһчудыг өсклһнә дамшлт болҗана, – гиҗ Хаска Бату онц темдглв.
ОЛЬДАН Цаһан