Үвлд белдҗәнә

Хальмг Таңһчин жилищн-коммунальн эдл-ахун болн энергетикин министерствин медлд үүлддг бүрдәцс давсн җиләс авн Антрацитовск районд дөң-тусан күргҗ, олн давхрта гермүдин ора яслһна, намрин-үвлин кемд гермүдиг дулаһар тетклһнд белдлһнә, усар тетклһнә сурвлҗ шинрүллһнә көдлмш күцәҗәнә.
Тиигәд, нидн бар сарла «Усна сурвлҗна багмудыг олзллһна заллт» гидг бүрдәцин мергҗлтнр Антрацит балһснд ик салькнас иштә эвдрсн гермүдин ора ясв. Теңгрин аюлас көлтә бәәрн әмтн ик зовлң үзв, бидн эднд эрк биш дөңгән күргх зөвтәвидн, гиҗ коммунальн эдл-ахун көдләчнр темдглҗ, ахр цагин эргцд гермүдинь ясч, тосхлтын көдлмш күцәв.
Намрин-үвлин кем эклхәс урд мана коммунальн бригадмуд Антрацит балһснд одад, гермүдин ора ясад, дулаһар болн усар тетклһнә сурвлҗ шинрүлв, хур-чиг орсн цагт усн гүүдг турвас цеврлв. Эн җилин эклцәр болхла, Лаганя, Октябрьск, Хар Һазра, Үстин болн Яшкулин райодын коммунальн цергллтсин көдләчнр хойр долан хонгтан тенд көдлв. Хальмг һаңначнр, сантехникүд болн нань чигн мергҗлтнр Антрацит балһсна ЖКХ-н көдләчнрлә хамдан усар тетклһнә сурвлҗин турвас сольлһна көдлмш күцәв. Тер мет эдн икәр орсн цаснас гермүдин эргндк һазриг цеврлв.
ДАВАН Наталья