Күч-көлснә диг-дара харна

Хальмг Таңһчин социальн делгрлтин, күч-көлснә болн көдлмшәр тетклһнә министерств күч-көлс харлһна сән гисн мергҗлтиг йилһҗ авв. Марһана ашар «Криосервис» гидг ООО-н мергҗлт Мөңкән Василий диилвр бәрв. Лаганя районд Әрәсән МЧС-ин заллтын әңгин элч Оскан Александр болн Хар Һазра района Артезиан селәнә дунд сурһулин мергҗлт Калян Жансая дииләчнрин тоод бас орв.
Таңһчин социальн делгрлтин министерствин күч-көлс харлһна әңгин һардач Ханьна Валерия марһанд диилвр бәрсн көдләчнрт диплом болн үнтә белг бәрүлҗ өгв. «Күч-көлс харлһна мергҗлтнр дааврта болн олнд туста көдлмш күцәнә. Мана таңһчд давулгддг марһан олн халхар үүлддг бүрдәцст көдләчнрин төлә сән таал тогталһна, эднә эрүл-менд харлһна болн әәмшг уга бәәдл тетклһнә туст дамшлтарн хувалцхд туслна», – гиҗ Ханьна Валерия келв.
«Криосервис» гидг ООО-н улд таңһчин бүрдәцсин күч-көлс харлһна мергҗлтнрин төлә семинар болв. Терүнд орлцачнр көдләчнрин әәмшг уга бәәдл тетклһнә, күч-көлс харлһна төрмүдәр ухан-тоолврарн хувалцв. Семинарт орлцачнрин төлә көдләчнрин шишлң хувц-хунрин, һосн-башмгин болн саглуллһна эв-арһсин һәәхүл бүрдәгдв. «Криосервис» гидг ООО күч-көлс харлһна, түүмрәс саглуллһна болн электрокүчнә әәмшг уга бәәдл тетклһнә, көдлмштән шав авсн улст түрүн дөң күрглһнә туст мергҗлтнриг белдлһнә сурһулин төв секв, тегәд семинарт орлцачнр терүнә үүлдврлә таньлдв.

ЗУРГТ: «Криосервис» гидг ООО-н улд болсн семинарт орлцачнр