Өвкнриннь авъясар бәәнә

Олег болн Цаһан Цереновихн хөрн һар җил хооран ханьцад, һурвн үртә эк-эцк болв. Эн җил эдн «Җилин сән гисн өрк-бүл» гидг марһанд орлцад, өвкнриннь авъяс хадһлдг өрк-бүлмүд дунд диилвр бәрв. Эн күцәмҗ өрк-бүлиг улм батрулад, эднд ик урмд өгв, элгн-саднднь болхла байр-бахмҗ үүдәв.

Эдн авъяс хадһлдг өрк-бүлмүд дунд ончрснь хара биш. Юңгад гихлә, Олег Владимировичин экнь Мария Андреевна Джибряева Лаганя района Улан Хол селәнә дунд сурһульд дөчн һар җилдән багшлсмн, Лаганя школ-интернатд көдлсмн. Элстин педагогическ училищ төгсәснә дару эн селәнә сурһульд күч-көлснә хаалһан экләд, кесг күүкд-көвүдт гүн медрл болн чик сурһмҗ өгсмн. Наһцхнь Сангаджи Джибряевич Наранов Сиврәс хәрҗ ирснә хөөн бас Улан Хол селәнә сурһульд көдлҗ йовсмн. Олег Владимирович болхла, IT-клубд немр сурһулин багш болҗ көдләд, дорас өсч йовдг баһ үйд өдгә цага эв-арһс олзллһна туст медрл зааҗ өгсмн. Цөөкн җил хооран эн эврә керг бүтәһәд, өдгә эв-арһсин халхар үүлдҗәнә. Цаһан Анджаевна авальнь С.Радонежскийин нертә Орс келн-улсин гимназьд эклц классин багшар көдлҗәнә. Эн хазгудын класс һардна, тегәд бичкдүдиг хазгудын тууҗла, сойлла таньлдулна. Олн җилдән сурһуль-эрдмин халхд көдлҗ, хазгудын сойл болн авъяс хадһллһнд, дорас өсч йовдг бичкдүдт төрскнч сурһмҗ өглһнд Цернә Цаһан ик тәвцән орулҗадг төләднь одахн энүг Хальмг Таңһчин Улсин Хуралын (Парламентин) Ахлачин Ханлтын бичгәр ачлв.
- Эн җил мана орн-нутгт өрк-бүлин җил болҗана, тегәд бидн эн марһанд орлцхар шиидвидн. Хаврин чилгчәр авалин бичкдүд эклц сурһулян төгсәв, тегәд марһанд белдвр кехд цаг бачм болв. Тер бийнь бидн арһ-чидлән агсад, күүкдтәһән хамдан билг-эрдмән һарһад, өрк-бүлиннь нериг өөдән бәрхәр зүтквидн. Тегәд диилвр бәрснь мана өрк-бүлд бахмҗта болн ончта йовдл болв. Бидн ик байрта бәәнәвидн. Маднд 50 миңһн арслңга мөрә өгв, терүгәр бидн хамдан зуульчлҗ амрхар зуралҗанавидн, – гиҗ Олег Владимирович келнә.
Цереновихнә өрк-бүл кесг марһанд орлцҗ, диилвр бәрсмн, кесг медаль – Күндллһнә һашгудар ачлгдсмн. Эдн келн-улсин хувцна Өдрт нерәдгдсн марһанд бас диилвр бәрәд ончрв. «Эк бичкдүдтәһән келн-улсин хувцта» гидг Әрәсән марһанд Цереновихнә өрк-бүл бас дииләчнрин тоод орсмн, эдниг Әрәсән телеүзләр болсн соңсхврт үзүлсмн. Олн үртә эцк гиигн атлетикәр болдг керг-үүлдврт орлцна, энүнлә хамдан авальнь болн күүкднь бас гүүхәр бәәнә. Ууһн Евгения Москва балһснд полицин колледж төгсәв, удл уга күч-көлснә хаалһан эклхмн. Йистә Виолетта болн долата Галсан орс келн-улсин гимназин сурһульчнр, эдн «Робофест» болн «ИКаРенок» марһаст орлцҗ күцәмҗ бәрҗ эк-эцкән байрлулна. «Диилвр бәрхин төлә кезә чигн зүткх кергтә» гисн дуудврар мана өрк-бүл олна нүүрт йовҗ, нерән дуудулхар шунна, гиҗ олн үртә эцк темдглнә. Цереновихн хамдан сул цаган давулҗ, теегт һарч сәәхн йиртмҗ һәәхч амрхдан дурта. Эдн бамб болн бадм цецгүдин наадмд орлцҗ, хальмг улсин сойлла бичкдүдән таньлдулна. Олег Владимирович зург цокна, тегәд өрк-бүлиннь ончта йовдлмудыг тодлулна.
Олн үртә эк-эцк хойр һурвн үрндән түшг болҗ, эдниг дөңннә. Виолетта өсәд-босхларн эмч эс гиҗ психолог болхар зуралҗана. Отхн Галсан англь кел дасчана, энүг өдгә цага эв-арһ соньмсулҗана, тегәд IT халхар эрдм шүүҗ авх чигн биз. Цаһан Анджаевна хойр күүкндән герән ахулҗ сән таал тогтадгиг, үүл бәрдгиг, хот болһдгиг дасхна. Олег Владимирович чик авг-бәрцәр бәәҗ, көвүнь чидлтә болхин төлә цогц-махмудан батрулҗ үлгүр болна. Галсан «Джунгар» командын ханьд хоккей наадна.
ДООҖАН Наталья
ЗУРГТ: ниитә Цереновихнә өрк-бүл