Валентина Матвиенкола харһв

Хальмг Таңһчин Толһач Хаска Бату Әрәсән Хүүвин Ахлач Валентина Матвиенкола харһв.
Валентина Ивановна мана таңһчин бачм төрмүдиг сәәнәр меднә. Тер мет эдл-ахун уулдврин, зуульчллһна делгрлтиг темдглв.
Бату Сергеевич иргч җилмүдин таңһчин делгрлтин зуран тускар келв. Шидр секгдсн аэропортын тускар бас темдглв. Терүнәс нань харһлтын йовудт Элст балһсиг цевр усар тетклһнә төр босхгдв. Федеральн төвин нилчәр Деед Яшкуль-Элст 18 дуунад болн Элстин ар-барун үзгт 1-ч тойгта усна хойр шин сурвлҗн тосхгдхмн.
– Валентина Матвиенко мана таңһчин төрмүдт онц оньган тусхаҗана. Энүнә нилчәр таңһчин эрүл-менд харлһна бүрдәцс ФОМС-ин халхар 470 сай арслң өрән даңцасмн. Валентина Ивановнад ханлтан өргҗ, хавртан бамб цецгүдин наадмд иртн, – гиҗ Бату Сергеевич үрвр кев.
ОЛЬДАН Цаһан