Баһ наста волонтер

Одахн Москван ВДНХ-д давҗадг «Әрәсә» һәәхүлин йовудт «Улсин фронт. Цугнь Диилврин төлә» буйнч седклин саңгин көдлмшин хойр җилд нерәдсн керг-үүлдвр болв. Тенд ончрсн орн-нутгин волонтермудыг ачлв.Керг-үүлдврт орлцсн Әрәсән Президентин һардврин һардачин негдгч дарук Сергей Кириенко Владимир Путинә йөрәлин бичг умшҗ олнд сонсулв.
Мадна төлә тенд нег байрта йовдл учрв. Тер юңгад гихлә нег һазра арвн негтә Антакана Санҗ «Сила тыла» гидг халхар ончрад ачлгдв. Нидн зуни амрлһна цагт Санҗ гиигн машид уһаһад, олсн мөңгән цергә шишлң керг-үүлдврт орлцачнрт илгәсн бәәҗ.
– Цергә шишлң керг-үүлдврин тускар соңсхла, би удан ухаллго, мадна эвин төлә дәәлдҗәдг улст бичкн болвчн эврә дөңгән илгәхәр шиидләв. Олсн нәәмн миңһн арслңган тиигәрән йовулсн биләв, – гиҗ Санҗ келв.
Әрәсән харслһна министрин дарук Юнус-Бек Евкуров болн Олимпийск наадна дииләч Светлана Ромашина хальмг көвүнд ачлвринь бәрүлҗ өгв. Хөөннь Антакана Санҗ Занда Климентьевна эктәһән хамдан Орн-нутгин Хүүвд ирәд, Башанкан Бадмла харһв. Бадм Николаевич Санҗиг йөрәһәд, Ханлтын бичгәр темдглв.
ОЛЬДАН Цаһан