Эврә кергән бүтәв

«Демографь» гидг келн-улсин төсвин «Көдлмш олҗ авхд туслһн» гидг көтлврин медлд көдлмш уга улс шаңһас демин мөңг авад, эврә керг бүтәҗ чадна. Яшкуль селәнд бәәдг Абуша Баатр тиим кевәр эврә кергән бүрдәҗ, өдмг болһдг болв. Ода энүнә болһсн өдмгиг бәәрн лавкст хулдҗ авч болхмн.

Района әмтиг көдлмшәр теткдг цергллтин мергҗлтнр энүнд керг бүрдәлһнд дөң-тусан күргәд, кергтә бәрмт цаас белдснә хөөн демин мөңг йилһҗ өгв. Абуша Баатр шаңһас авсн 169 миңһн арслңгиг олзта-тустаһар олзлад, өдмг болһдг кергән эклв. «Урднь би лавкчар көдлҗәләв, болв эврә керг бүрдәхин тускар ухалдг биләв. Көдлмш уга улст эврә керг бүрдәх санан бәәхлә, шаңһа туслмҗ олзлҗ болхиг соңсад, әмтиг көдлмшәр тетклһнә района цергллтд ирәд, кергтә цаас оруллав. Тиигҗ дарунь мини санан күцх гиҗ санҗасн угав. Ода өдмг болһсн деерән һуйрин зүүтә әмтәхн кегдлмүд болһҗ һарһхин тускар ухалҗанав. Района әмтиг көдлмшәр теткдг цергллтин мергҗлтнрт би ханлтан өргҗәнәв», – гиҗ Абуша Баатр келнә.
БАТАН Сәәхлә