Олн улсиг хамцулҗ эврә сойлан делгрүлх

Давсн басң өдрлә Элстд таңһчин һәәхүлин төвд баһчудын шаҗна ик хург байрин бәәдлд секгдв. Әрәсән шар шаҗна төв заллтын ахлач гевш Йонтен нүр үгәр ик хургиг секв. Москван, Бурятин, Тыван, Алтан, Хальмг Таңһчин, Әәдрхнә болн Москван мүҗсин баһчуд баг-багар хувагдад, Бурхн багшин номин болн олна төрәр болсн өргн керг-үүлдврт орлцв.
Дарунь эклсн сессьт Хальмг Таңһчин Толһач Хаска Бату хургт орлцачнриг йөрәв. Хальмг һазрт ода баһчудын шар шаҗна ик хург эклҗәнә, терүнә көдлмшнь күцәмҗтә болтха гиҗ дурдв. Ик хургин зурсн темдгнь чигн йир гүн учр-утхта, терүг үүдәсн улст ханлтан өргҗәнәв, гиҗ Бату Сергеевич келв.
- Мана орн-нутгин кесг регионас ирсн баһчудыг эн ик хург хамцулҗана. Эдн нег ухан седклтә болсн деерән цааранднь медрлән гүүдүлҗ оюни делгрлтиг өргҗүлхәр бәәнә. Элстд болҗадг ик хург тер кергт туслхмн.
Бурхн Багш бас баһ настадан эврә хаалһан олҗ авад, терүнә чинринь олн улст цәәлһсмн. Баһчудын күчәр мана делкә сольгдад, делгрлтин хаалһд орна. Тер мет шар шаҗна шинҗллтд нилчән күргҗәдг Әрәсән саңд, Әрәсән шар шаҗна төвин оюни заллтын ахлач гевш Йонтенд, Хальмгин Шаҗн Лам гевш Тензин Чойдакд болн ик хург бүрдәлһнд нилчән күргсн цуг улст ханлтан өргҗәнәв. Әрәсән келн-улсин ниицлтин җил мана орн-нутгт болҗана, тегәд мана хамцлтд мана күчн гидхиг бидн дәкн нег иткүлҗәнәвидн, - гиҗ Хаска Бату товчлв.
Хальмгин Шаҗн Лам Тензин Чойдак хургт орлцачнрт бас йөрәлин үг келәд, мана регионмудын баһчудын хоорндк нөкцлт өргҗәд йовтха гиҗ дурдв. Цааранднь Элстин орс чонҗин элч Антоний Зимовец үг келв. Баһчуд номин шинҗллтд, экономикин, спортын халхар ик күцәмҗ бәрҗ йовна, эврә орн-нутгин, төрскн һазрин делгрлтд ач-тусан күргҗәнә, гиҗ орс чонҗин элч келв. Тер мет исламд шүтдг шаҗна заллтын ахлачин дарук Раджаб Зияутдинов үг келв. Мана таңһчд кесг шаҗна болн келн-улсин элчнр эвин таалд бәәнә. Тадн, баһчуд, мана иргч болҗанат, тана медрл, тана сурһмҗ мана таңһчд болн бүклдән Әрәсәд тогтурта бәәдл хадһллһнд нилчән күргәд бәәх гив.
Цааранднь Тыва Республикин Камбы Лам Лоден Шераб болн Алтан Республикин элч Радж лам үг келҗ ик хургт ирсн баһчудт күцәмҗ дурдҗ, теднә көдлмш сән ашта болтха гиҗ йөрәв.
- Мана саң кесг җилин туршарт Хальмг Таңһчла сән хәрлцә бәрҗ йовна. Энд болдг олна керг-үүлдвр кезә чигн ик чинртә болна, - гиҗ Әрәсән шар шаҗна сурһуль-эрдмин болн шинҗллтин саңгин вице-президент Денис Возилов келәд, эн саңгин ахлач Алексей Маслов илгәсн йөрәлин бичг умшв. Элст кесг зун җилин туршарт Бурхн Багшин ном хадһлҗ делгрүлҗәнә. Баһчуд бурхн-шаҗна халхар гүн медрл авч, олна үүлдврт шунмһаһар орлцх зөвтә гиҗ бичгт келгдв.
Цааранднь сессин йовудт баһ наста орлцачнр дамшлтта ламнрла болн нань чигн сурһмҗлачнрла ухан-тоолврарн хувалцв. Эн күүндврт Хальмг Таңһчин Толһач Хаска Бату болн таңһчин залврин Ахлач Босхмҗин Гилән орлцв. Эндр оюни болн сойлын залһлдаһан батрулх кергтә, тернь Әрәсән келн-улсин ниицлтин җилд ик чинр зүүнә гиҗ таңһчин Толһач сүүрин йовудт темдглв. Тиим хургудт баһчуд нег-негән сәәнәр медҗ авна, шаҗна авъясиг иргч үйнрин төлә хадһлҗ терүг делгрүлнә, гиҗ Бату Сергеевич келв.
Хальмг Таңһчин делгрлтин төлә бидн кесг тоот күцәх зөвтәвидн, тер кергт баһчуд шунлттаһар орлцҗ өдгә цагин медрл хоршах зөвтә гиҗ сессин йовудт келгдв. Зуульчллһна онц көтлвр кергтә гиҗ күүндврт орлцачнр заав. Терүнә улд Әрәсән кесг регионас ирсн баһчуд шар шаҗна өврмҗтә ховр тоотла таньлдҗ һәәхмҗтә кесг һазрт одхла, туста болх гиҗ күүндврт орлцачнр тоолвран медүлв.
Цааранднь Хальмг Таңһчин Шаҗн Ламин лекц болв. Өдр болһн йирин бәәдл-җирһлин шагшавдын зокалыг олзлхла туста болх гиҗ гевш Тензин Чойдак темдглв. Талдан келн-улсин болн сойлын элчнрлә кесн харһлт ик туста болна, тиим кевәр тадн бурхн-шаҗна ул-сүүр әдл болҗахинь медҗ авхит. Лекцин чилгчәр Шаҗн Лам баһчудын кесг сурврт хәрү өгв.
Үдин хөөн эврә кезәңк сойлын болн авъясин тускар күүндвр болв. Өдгә цага шин эв-арһс делгрлҗәнә, болв эврә сойлан болн авъясан цааранднь хадһлх кергтә гиҗ орлцачнр тоолвран келв. Баһчудт эврә келн-улсин тууҗан медҗ авх кергтә, тиигхлә өдгә цагин таалд эврә сойлан болн авъясан хадһлҗ, тәвсн күслдән күрч болҗана гиҗ заагдв.
Көгҗмин лабораторь баһчудт бас таасгдв. Никита Глухов өдгә цагин көгҗмин зурц үзүлв болн дууна туск медрләрн хувалцв. Эн Пушкинә, Есенинә болн нань чигн нертә шүлгчнрин үүдәврин улд шин көгҗм үүдәнә. Хургт орлцачнр эднд өгсн даалһврин йовудт эврә дууһан үүдәҗ чадв. Бурятяс ирсн Булат Цыбикжаповин келсәр, эн хургт эдн шин медрл болн дамшлт хоршав, тернь ик туста болв. Эн Бурятин Улан Удэ балһснд бәәнә, М.Ломоносовин нертә МГУ төгсәсмн. Хальмг Таңһчд ZAM багин концерт хойрдад ирҗәх болв.
Ик хургин түрүн өдр болв, эн багиг Хальмг Таңһчин билг-эрдмин ачта үүлдәч Катан Савр һардҗана. Хальмг Таңһчин Толһач Хаска Батун седвәрәр секгдсн баһчудын ик хургт нертә гиичнр орлцҗ дамшлтарн хувалцснь темдгтә. Тиигәд «Классная страна» АНО-н һардач Анастасия Цыбулевская болн нань чигн шинҗләчнр ик хургиг йовудтаһар давуллһнд ик нилчән күргв.





















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.