Элстд артистнрин Гер секгдхмн

Сегодня, 13:14 | Общество, Таңһчин зәңгс, Зіњг

Давсн долан хонгт Элстд түрүн болҗ шар шаҗна баһчудын ик хург болв. Кесг өдрмүдин туршарт Хальмг Таңһчин, Бурятин, Тыван, Алтан Республикүдин, Москван болн хам-хоша бәәдг регионмудын баһчуд ирлцңгү төрмүд хаһлҗ, номтнрла, шинҗләчнрлә, нертә артистнрлә болн талдан улсла харһҗ күүндв.
Бембә өдрлә багш Зурһадан Дольган өрүн эрт йоган кичәл давулв. Баһчуд кииһән авч, цогцан яһҗ батрулхинь медҗ авв. Дарунь Тыва Республикин Камбы Лам Лоден Шераб «Өдр болһн күцәдг шар шаҗна дамшлт» нертә лекц умшв. Терүнә йовудт баһчуд өдр болһн олн-әмтнд дөң-нөкд болад, килнцәс яһҗ саглхинь оньган өгч соңсв.

Хальмгин нертә режиссермүд Сарңга Алексей, Пурсяка Санҗ, Басңга Баатрин нертә Келн-улсин академическ театрин артистнр Карина Донцова болн Санҗин Байрта «Олн-әмтнлә ниитәһәр бәәлһн болн эмәлго тоолвран келҗ медүллһн» гидг төрәр ирлцңгү кичәл давулсн болдг. Баһчуд дөрвн багд хувагдад, шогта-инәдтә керг-үүлдврт орлцв.
Чонкуша Петрин нертә билг-эрдмин колледжин багш, зурач Куберлинә Андрей өдгә цагин шар шаҗна төрәр бичсн үүдәврмүдин тускар келҗ өгв. Темдглхд, энүнә һардврт Элстин кесг гермүдин эрсмүдт зурсн зургудын тускар баһчудт бас цәәлһв. Номин доктор Светлана Батырева болхла «Шар шаҗна төр Хальмгин билг-эрдмин тууҗд» гисн төрәр лекц умшв.
Билг-эрдмин тууҗин тускар медрл авч, көвүд-күүкд «Медиа болн шар шаҗн» төрәр болсн күүндврт орлцв. Энүг Гевш Йонтен давулв. Өдгә цагт шар шаҗна тускар олнд яһҗ медүлхинь баһчудт цәәлһв. «Социальный проект за 90 минут» нертә марһан соньн болв, гиҗ келх кергтә. Кесг багд хувагдсн баһчуд олн зүсн даалһвр күцәһәд, шар шаҗна туск медрлән олзлад, ямр чигн нәрн төрмүд хаһлҗ чадв. Йирн минутд баг болһн эврә төсвән үүдәҗ, олна оньгт тусхав.
Тер өдр асхн хургт орлцачнр цуһар Басңга Баатрин нертә Келн-улсин академическ театрт цуглрв. Тенд Әрәсән Федерацин улсин артист, Б.Щукинә нертә театрин ик сурһулин һардач Евгений Князевин орлцлһтаһар болсн «Пиковая дама» мононаад хәләв. Күндтә хәләһәчнрин дунд Хальмг Таңһчин Толһач Хаска Бату бәәснь темдгтә болв. Наадна чилгчәр Бату Сергеевич тәәз деер һарч, нертә артистд бүлән үгән нерәдв.
– Евгений Князев Элстд ирәд, шар шаҗна баһчудын хургт орлцснднь бидн цугтан ханмҗта бәәнәвидн. 2019 җилд түрүн болҗ Хальмг Таңһчин көвүд-күүкд Б.Щукинә нертә театрин ик сурһульд орҗ сурв. Цаарандан чигн эн ик сурһульла нөкцлтән делгрүләд бәәхвидн. Элстд артистын Гер секхәр зуралҗанавидн, эннь артистнрин болн билг-эрдмин үүлдәчнрин төлә соньн талвң болхнь лавта, – гиҗ Бату Сергеевич келв.
Дарунь Хаска Бату Евгений Князевд Хальмг Таңһчин билг-эрдмин ачта үүлдәчин нер зүүлһгдснә тускар зәңглв.