Барун селәнә билгтә баһчуд

Сегодня, 13:03 | Общество, Таңһчин зәңгс, Зіњг

Эндр мана орн-нутгин болн таңһчин һардвр эсв болн физик дигтә-даратаһар даслһнд һол оньган өгчәнә. Сурһульчнр гүн медрл авч, эн кичәлмүдәр соньмсхин төлә олн керг-үүлдвр болн марһан давулгдна. Үстин района Барун селәнә сурһулин элчнр эн кичәләр бат медрл үзүлҗ нер һардгнь бахмҗта йовдл мөн.

Тиигәд одахн Хальмг ик сурһулин улд болсн физикин болн техникин VIII Цугәрәсән керг-үүлдвр болв. «Ирәд, эсвин тәәлвр олҗ ав!»- гиҗ эн нерәдгдв. Сурһульчнрин медрл сөрлһнә марһанд Хальмг Таңһчин, Луганск Улсин Республикин арвтнр болн Хальмг ик сурһулин бичкдүдин ик сурһулин элчнр чидлән сөрв.
Баруна дунд сурһулин 9-10-ч классмудын сурһульчнр физикәр цуг даалһвр күцәһәд, диилвр бәрв. Тер мет 8-9-ч классмудын сурһульчнр дунд Баруна элчнр эсвин көдлмшиг күцәмҗтәһәр бичв. Городовиковск балһсна гимназин 11-ч классин сурһульчнр эсвин даалһвриг бас сәәнәр күцәв. Тиим кевәр селәнә сурһульд чигн бат медрл авч болҗана гиҗ эн сурһульмудын күүкд-көвүд иткүлв.
Барун селәнә дунд сурһулин һардач Бембин Ларисан келсәр, одахн эсвин багш Элдшинә Римма Хальмг Таңһчин Толһачин мөрәһәр ачлгдв. Эн багшин сурһульчнр дунд марһасин дииләчнр бәәнә, эдн талдан балһсдын ик сурһульд сурна. Багшнь эднд эсвәр бат медрл өгснь сурһулян сәәнәр сурхд туслҗахнь лавта.
Эн җил сурһулян төгсәсн дөрвн күүнәс хойрнь цаһан мөңгн медаляр ачлгдв. Теднә негнь, Дертән Милана Москван МВД-н ик сурһульд орв, тенд нарт-делкән зөв-йос харлһна эрдм дасчана. Келхд, Миланан эцкнь Чечняд болсн цергә керг-үүлдврт орлцла. Афганистанд, Чечняд болсн дәәнд, ода цергә шишлң керг-үүлдврт орлцачнрин, тер тоод Барун селәнә баатрмудын тускар сурһулин болн селәнә музеймүдин һәәхүлмүдт өргнәр келгднә. Нег һазра дәәчнрин туск хәәврин көдлмшт Дертән Милана бас шунлттаһар орлцла. «Бичкн Төрскм» гидг таңһчин марһанд Баруна дунд сурһулин элчнрлә хамдан орлцад, Милана шинҗллтин көдлмшән харсад, нүүрлгч орм эзлсн билә.
Сурһульчнрин цуглулсн хамг тоот Барун селәнә музейин һәәхүлд һоллгч орм эзлҗәнә. Тер мет сурһулин музейд селәнә тууҗин, Төрскән харсгч Алдр дәәнд орлцсн баатрмудын туск ховр тоот бәәнә. Тиигҗ эдн эврә селәнә тууҗиг хадһлҗ, терүнә тускар ирсн гиичнрт, бичкдүдт келҗ өгнә. Сурһульчнр музейин керг делгрүлҗ, шин бәрмт цаасд, зургуд цуглулҗ, таңһчин болн района бәәтхә, Цугәрәсән марһаст орлцҗ нер һарна. Барун селәнә дунд сурһулин багшнр бичкдүдлә төрскнч сурһмҗ өгхәр зүткнә.
Эн җил сурһулян йилһән сәәнәр төгсәсн дәкәд нег сурһульч Ренат Ускинбаев Москван МЧС-ин академьд орҗ сурчана. Дарман Дарина Китдин Пекин хотл балһсна ик сурһулин оютн болв. Харан Роман Хальмг ик сурһульд китд келнә магистратурт сурчана. Саңһҗбалдана Александр Аһшин ик сурһулин СПО-д медрлән гүүдүлҗәнә. Барун селәнә дунд сурһулин күүкд-көвүд эсвин болн физикин халхар гүн медрл дасад, тааста эрдм шүүҗ авснь бахмҗта. Селәнә баһчуд сән мергҗлтнр болҗ орн-нутгтан болн таңһчдан тусан күргхнь лавта.

ТҮРВӘН Һуна