Зөв-йос харлһна төрмүд хаһлна

Сегодня, 13:07 | Общество, Таңһчин зәңгс, Зіњг

Эндр МВД-н медлд бәәдг әңгүдин дааврта көдләчнр сән Өдрән темдглҗәнә. Энд церглҗәдг улс әәмшг уга бәәдл тогталһнд хамгин түрүн зергләнд йовна гиҗ келх кергтә, балһсдын болн селәдин иргнмүдт мел эдн түрүн дөң болхар ирнә. Дәкәд темдглхд, әңгүдин дааврта көдләчнр полицин талдан көдләчнрәс юуһарн йилһрнә гихлә, эдн бәәрн улсла өөрхнәр залһлда бәрҗ көдлнә. Әңгин көдләч уульнцст бәәдг күн болһниг меднә гиҗ келдг. Өдр болһн эдн эк-эцкнь үрдтән килмҗән тусхалго әср, зөв-йос эвдсн арвтнр бәәдг өрк-бүлмүдиг бүрткнә.
1923 җилд үкр сарин 17-д «Участкин көдләчин шишлң бәрмт цаасн» батлгдв. Эннь милицин шин цергллт бүрдәлһнд туслв. 1930 җилд милицин инспектормуд бәәсмн, хөөннь тедниг әңгүдин дааврта көдләчнр гиҗ нерәддг болв. 2002 җилд болхла цергллтин көдлмшнь үнлгдәд, үкр сарин 17-д әңгүдин дааврта көдләчнрин сән Өдр темдглгдг болв.
Җил болһн цергллтин сән Өдр угтҗ участкудын дааврта көдләчнрин дунд «Народный участковый» нертә Цугәрәсән марһан давулгдна. Эртәснь орн-нутгин регион болһнд әңгүдин хамгин сән дааврта көдләч шүүҗ авгдна. Хөөннь регион болһна элч Цугәрәсән марһанд орлцна.
Эн җил Баһ Дөрвдә муниципалитетмүдин хоорндк полицин әңгин элч Пүрвән Басң таңһчин ирлцңгү марһанд ончрад, хойрдгч орм эзлсн болдг. Басң Борисович Унһн Төөрәч селәнд өсч-босад, Баһ Дөрвдә 3-ч тойгта дунд сурһуль төгсәв. 2013 җилд Хальмг ик сурһуль төгсәһәд, дарунь цергт мордв. Ингушетьд артиллерин әңгд цергләд ирснә дару эн 2023 җилд полицин ППС-ин әңгд экләд көдлв. Җилдән көдләд, дарунь Тундутово селәнә әңгин дааврта көдләчин үүл энүнд даалһгдв. Дамшлтан хоршаһад, эн җилин така сарас авн Басң Борисович Баһ Дөрвдә муниципалитетмүдин хоорндк әңгин ах көдләчәр үүлдҗәнә.
Җил болһн «Народный участковый» марһанд көдлмштән күцәмҗ бәрсн улс орлцх зөв авна. Пүрвән Басң көдлмшән үнн-чик седклтәһәр күцәнә. Үлгүрлхд, нидн Баһ Дөрвдә районд фермерин хошт мал хулхалгдв. Зөв-йос эвдсн кү җилдән хәәсн бийнь олгдсн уга, зуг даруһас мел Басң Борисович хулхачиг олҗ авв.
Полицд экләд көдлхдм нанд ах үүрмүд Дорҗин Иван, Баркун Баатр болн талдан улс цугинь зааҗ дөңгән күргв, гиҗ Пүрвән Басң ханмҗтаһар келнә. Дааврта көдләч болсн деерән эн хойр үртә килмҗтә эцк болна. Деля авальнь хойр үрән арднь орҗ хәләҗәдг кемд герин эзн Басң болхла ик зуудан көдлмштән йовна. Зурһата Сумьян бөк бәрлдәнә секцд дамшна, һурвта Арьяна күүкнь болхла бииһин кичәлмүдт одхдан дурта. Хая-хая эцкднь амрдг цол учрхла Пюрвеевихн зуульчлна.
Басң Борисович көдлмшән даңгин цаг-болзгтнь күцәнә. Җил ирвәс полицин ах мергҗлтнрәс үлгүр, медрл авч дамшлтан эн хоршана. Кесг җилдән көдләд, хамдан көдлҗәдг улсин дунд күндллһ болн тоомср олв гиҗ темдглх кергтә.

КАРСАНА Евгения
Зургт: Пүрвән Басң өрк-бүлтәһән