Цугәрәсән баһчудын олна ниицән бүрдәгдх

Баһчудын шаҗна ик хургт орлцачнр сойлын көтлврин йовудт театрт, музейд одад хальмг улсин сойлла, тууҗла таньлдҗ цаган сергмҗтәһәр давулв.
«Путь Дхармы» гидг наадна йовудт баһчуд хамдан үүлдҗ, нег-негнәннь тоолвр учртан авч, талдан улст дөң-нөкд болҗ хамцу көдлхлә ямаран чигн керг күцәгддгиг медв. Шар шаҗнд шүтдг улсин төв заллтын һардач, гевш Йонтен болн Тыва Республикин Камбы Лам Лоден Шераб баһчуд даалһвр яһҗ күцәсиг шинҗләд, сүв-селвгән өгәд, эднд нөкд болв.
- Шар шаҗнд шүтдг күн хамгин түрүнд талдан улст нөкд болхар зүткх зөвтә. Күн болһн эврә ухан-тоолврта, эврә хәләцтә болна, тегәд күн болһниг оньган өгч соңсад, хамцу шиидвр авсна хөөн тадн даалһвриг күцәҗ чадвт. Тиим кевәр эврәннь җирһлд тадн хамцу үүлдснә ашт тәвсн күслдән эрк биш күрч чадхит. Эн нааднд хамгин һоллгчнь тана хамцу үүлдвр болв, - гиҗ гевш Йонтен келв.
Наадна хөөн баһчуд дәкн 9 багд хувагдад, урднь белдсн социальн төсвсин тускар күүндв. Тиигәд, баһчуд олна ниицә бүрдәлһнә, мөрә шүүҗ авч терүнә үүлдвриг делгрүллһнә, әрүн чинртә һазрт зуульчллһна болн нань чигн төрмүд босхв. Баһчудын ниицәнә үүлдвриг дигтә-даратаһар бүрдәҗ, хамцу керг-үүлдврмүд давулхин төлә Москва балһснд бәәдг хурлд эдн цуглрҗ чадхмн. Цугәрәсән шар шаҗна баһчудын олна ниицә бүрдәлһиг дөңнҗ, баһчудт бурхн-шаҗна керг делгрүллһнд дөң-тусан күргхдән белн бәәнәвидн, гиҗ Йонтен гевш келв.
Ик хургин йовудт баһчуд Әрәсән Улсин артист Евгений Князевин наад хәләсн билә. Маңһдуртнь Евгений Владимирович баһчудла харһад, сойлын болн билг-эрдмин тускар күүндв. Келхд, эн һардҗадг Б.Щукинә нертә ик сурһульд Хальмг, Бурять болн Тыва Республикүдин баһчуд сурна, тегәд нертә артист эднә тускар буульмҗта үгмүд келснь темдгтә.
- Би эндр Хальмгин төв хурлд одад, насан утдуллһна мөргүлд дала күн ирсиг үзүв. Хурлд дала әмтн цуглрснь намаг өврүлв. Ода тадн иргчдән мана алдр Әрәсәг уралан залх улс болҗанат. Иим хург ик чинр зүүҗәнә, юңгад гихлә баһ наста улст өвкнрин сойл-тууҗиг медх кергтә. Мана ик сурһульд шар шаҗна регионмудын баһчуд сурна, эдн цаһан седклтә, билгтә улс мөн. Хальмг Таңһчд болн Бурятьд театрин билг-эрдм өргнәр делгрҗәнә, - гиҗ Евгений Владимирович темдглв.
Гевш Йонтен күндтә гиичд хальмг авъясар хадг татад, мана Әрәсәд олн келн-улс бәәнә, тегәд баһчудт кен-негнәннь авъяс, сойл, күндлҗ бәәх кергтә гив.
Үдин хөөн хургт орлцачнр экскурсьт өдв. Эдн Н.Пальмовин нертә Келн-улсин музейд, хальмг улсин тууҗин, бәәдл-җирһлин тускар медүлҗәдг соньн тоот хәләв. Тер мет номт Борлга Босха шар шаҗна көгҗмин, хальмг зевсгүдин туск лекц умшв. Хальмгин билг-эрдмин ачта үүлдәч Катан Савр җил болһн һурвн эрдньд көгҗмәр дееҗ бәрлһнә наадмин тускар зәңглв.
Тыва Республикәс ирсн Долаан маднла тоолврарн хувалцҗ, Хальмг Таңһчд давулгдсн өдрмүд кесгтән мартгдшго гив. Энүнә келсәр, эднә делегацин ханьд хөрн тавн күн ирв. «Би түрүн болҗ нааран ирүв, энд мадниг бүләнәр тосад, соньн керг-үүлдврмүд давулснд ик ханлтта бәәнәв. Хальмг улс цаһан седклтә, төрскн һазртан эңкр улс мөн. Ик хургин йовудт кесг соньн керг-үүлдвр, харһлт болв. «Зам» багин концерт нанд икәр таасгдв, хальмг улсин сойл өврмҗтә. Әрәсән Улсин артист Евгений Князевин наад хәләһәд, энүнлә харһад, келн-улсин сойл, авъяс хадһллһна, өвкнриннь тууҗ күндллһнә тускар күүндснь соньн болв. Би эврән тосхлтын халхд көдлнәв, 2010 җиләс авн баһчудын шаҗна олна ниицәнә гешүн болнав. Бидн мана багшин һардврт ном-сурһаль дасад, цер бәрҗ, бурхн-шаҗна тускар күүнднәвидн. Тыван Камбы Лам Лоден Шераб мана олна ниицәнә үүлдврт орлцҗ, дөң-нөкд болна. Иим хургуд бурхн-шаҗна делгрлтд, ах-дүүнр улсин иньгллт батруллһнд эрк биш туслна. Дарани хургиг мана республикд давулхин тускар зәңглснь маднд ик бахмҗта болв», – гиҗ Долаан келв.
Түрвән Һуна,
КАРСАНА Евгения,
ДООҖАН Наталья




















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.