«Мини эцк –Баатр»

Сегодня, 13:17 | Общество, Таңһчин зәңгс, Зіњг

Шидр бичкдүдин үүдәлтин бәәшңд «Мини эцк –Баатр» гидг зургудын марһана аш диглгдв. Төрскән харсачнрин өрк-бүлмүдин әңгин седвәрәр давулгдсн марһанд 5-ас авн 14 нас күртл бичкдүд орлцад, залу-зөрмгин, эцкин килмҗин, өрк-бүлин дурна тускар зургудан зурв. Хальмг Таңһчин Улсин Хуралын (Парламентин) Ахлач Артем Михайлов, таңһчд күүнә зөв харсдг элч Валерий Чуб, таңһчин Олна палатын ахлач Мучан Батыр, Төрскән харсачнрин өрк-бүлмүдин әңгин ахлач Кокан Виталия орлцад, бичкдүдиг ачлв.

- Иим марһас өрк-бүлин чинр өөдлүллһнд, дорас өсч йовдг баһ үй эк-эцкән болн Төрскән харсачнриг тевчдг сурһмҗ зааҗ өглһнд туслна. Бичкдүд эврәннь зургудтан эцкнртән дуран медүлҗ, тедн Төрскән харсад, залу-зөрмгән үзүлҗәхнь эднд бахмҗ үүдәҗәнә. Эн марһан үйнрин залһлда батрулҗана, - гиҗ Артем Михайлов темдглв.
Эн марһа бүрдәсн олна ниицәнә ахлач Кокан Виталия баһчудт төрскнч сурһмҗ өглһнд, мана цергчнрт дөң күрглһнә буйнч седклин керг-үүлдврмүд давуллһнд ач-тусан күргҗәдг төләднь Хальмг Таңһчин Улсин Хуралын (Парламентин) Ахлачин Ханлтын бичг бәрүлҗ өггдв.
Марһана ашар 5-7 наста бичкдүд дунд Мария Евстратенко, Басхан Данзн болн Чидана Айлана, 7-10 наста күүкд-көвүд дунд Лиҗин Дарима, Һәрән Алтн болн Цевгә Мира дииләчнр болв, 10-14 наста арвтнр дунд болхла Элина Луханина, Иляна Клипова болн Муҗикә Валерия ачлгдв.
Байрин керг-үүлдврин йовудт Хальмг филармоня артистнр болн бичкдүдин үүдәлтин бәәшңгин үүдәгч багмудт орлцачнр билг-эрдмән үзүлҗ, харһлтын кеермҗ болв.