Эрмдгтә улсин төрмүд хәләв

Шидр Элстд Хальмг Таңһчин Толһачин медлд үүлддг шалтгта улсин керг-төрин хүүвин дарани сүүр болв. Терүг Хальмг Таңһчин Улсин Хуралд (Парламентд) таңһчин Толһачин элч Манҗин Араш һардҗ давулв. Сүүрт таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, күцәгч йосна болн эрмдгтә улсин олна бүрдәцсин элчнр орлцв. Хүүвин гешүд һурвн төр хәләв, эннь шалтгта бичкдүдиг асрҗадг өрк-бүлмүдиг дөңнлһнә туст социальн теткврин бүрдәцсин үүлдврин, «Сурһуль-эрдм» гидг келн-улсин төсвин медлд коррекционн сурһульмудын үүлдвр бүрдәлһнә, «Төрскән харсачнр» саңгин региональн әңг цергә шишлң керг-үүлдврт орлцачнрт дөң күрглһнә төрмүд болв.

Таңһчин социальн делгрлтин министрин дарук Һәрән Ольга түрүн сурврар зәңгллһ кеһәд, ода мана таңһчд эрмдгтә бичкдүдиг асрҗадг өрк-бүлмүдиг дөңнлһнә туст хойр бүрдәц үүлдҗәнә гив. Эннь эрмдгтә бичкдүдин реабилитацин Tөв болн ухань тату гемтә бичкдүдин гер-интернат болна. Эн хойр бүрдәц эрмдгтә бичкдүдт медико-социальн реабилитацин, эмнлһнә керг-үүлдвр күцәлһнә туст туслмҗ күргнә. Шалтгта бичкдүдин реабилитацин Tөвд 2024 җилин эклцәс авн 297 күүкн-көвүнд дөң күрггдв. КТК-Р социальн бүрдәцин материальн-техническ ул батруллһна төрт орлцҗ, дөң-тусан күргҗәхин тускар Ольга Владимировна келв. Тиигәд, компаня дөңгәр Tөв шин автобуста болв, энд реабилитацин кергсл углҗ тәвгдв, 2020 җилд бас ясвр кегдв. Ухань тату бичкдүдин гер-интернатд 80 орм бәәнә, ода энд 55 күүкн-көвүн бәәнә. 2017-2018 җилмүдт интернатын улд өдрәр үүлддг баг секлһнә төр хаһлгдв, тегәд эрмдгтә бичкдүд нааран ирәд, мергҗлтнрин хәләврт олн зүсн кичәлд орлцна, билг-эрдмән делгрүлнә. Ода хойр тиим баг үүлдҗәнә.
Хальмг Таңһчин сурһуль-эрдмин болн номин министерствин әңгин һардач Лузгана Виктория таңһчд үүлддг коррекционн сурһульмудын үүлдврин тускар келв. Энүнә үгәр, мана таңһчд гемтә-шалтгта бичкдүдин төлә 7 сурһуль үүлднә, тенд 286 күүкн-көвүн сурчана. «Сурһуль-эрдм» гидг келн-улсин төсвин медлд 2020-2021 җилмүдт Элстин, Лаганя болн Сарпан коррекционн сурһульмудын материальн-техническ ул батрулгдв. Энд өдгә цага кергсл углҗ тәвгдв, сурһулин үүлдвр ясрулхин төлә шишлң хорас секгдв. Элстин сурһуль-интернатд теплиц тосхгдв, уячин, замчин хорас секгдв, логопедин болн психологин дөң күрглһнә, селәнә эдл-ахун халхар медрл хоршахин төлә сән таал тогтагдв. Сарпан болн Лаганя коррекционн сурһульмудт бас тиим хорас секгдв, бичкдүд билг-эрдмән делгрүлҗ көгҗмин, зурлһна кичәлмүдт сурна.
Сүүрт цергә шишлң керг-үүлдврт орлцсна ашт шав авсн орлцачнрт дөң күрглһнә төр бас хәләгдв. Эн төрәр «Төрскән харсачнр» саңгин региональн әңгин һардачин дарук Чимдә Ася тооцаһан өгв. Мана таңһчд шаңһа саңгин әңг давсн җилд мөчн сарас авн үүлдҗәнә. Региональн әңгд социальн 20 зүүцүләч көдлнә, эднә хәләврт 400 күн бәәнә. СВО-д орлцсна ашт эрмдгтә болсн 24 ветеран мана таңһчд ода бәәнә, саңгин көдләчнр эднә төрмүдт орлцҗ дөңгән күргнә. Ниднәс авн 1897 күн саңгин әңгд ирәд, олн зүсн төр хаһлхд дөң болхин туст эрлһән орулв, эднәс 281 күн цергәс бууҗ ирсн улс болна. Цергчнр болн эднә өрк-бүлмүд ветерана иткл цаас авхд, зәңг зә угаһар геедрсн улсиг олҗ авхд, техническ эв-арһсар тетклһнә, эмнлһ авлһна болн нань чигн төрмүд хаһлхд дөң болхиг сурна. Ася Викторовна цергчнрин төрмүд хаһлхин төлә ямаран керг-үүлдврмүд күцәгдҗәдгин тускар келҗ өгәд, таңһчин күцәгч йосна бүрдәцслә хамцу үүлдҗәхән медүлв.

ДООҖАН Наталья