Сән дурар үүлддг баһчудыг йөрәв

08-12-2020, 14:21 | Общество

-Күндтә волонтермуд, бидн тана үнн-чик седклд ханҗанавидн, әмән хәәрлл уга көдлҗәхитн өөдәнәр үнлҗәнәвидн. Цааранднь чигн хамдан ниитә кевәр, өөрән бәәх улст ицгтә түшг болҗ үүлдҗ йовтн гиҗ дурдҗанавидн, - гиҗ Анатолий Васильевич келәд, сән дурар үүлддг баһчудт Ханлтын бичг бәрүлҗ өгв.
Җамбин Альвина бас баһчудт ханлтан өргҗ, эднә седвәр болн һольшг седкл кесг улст күнд цагла омг өгсиг темдглв. Эн җил пандемий учрсн цагт сән дурар үүлддг улсин җисән эркн чинр зүүв гиҗ эн келв. «Цуг мана орн-нутгар, тер тоод мана таңһчд баһ тетквртә, медәтә болн җирһлин күнд таалд туссн улст дөң күрглһнә волонтерск штабмуд үүлдв. Кесг улс өр-өвч седклән медүлҗ, эврәннь цаган, арһ-чидлән, дуран өгч эднә дөң керглгдҗәх әмтнд тусан күргв. Коронавирусн гемәс хөрлһнә кергт шунмһаһар орлцсн таднд ханлтан өргҗәнәв»,- гиҗ региональн әңгин сегләтрин дарук келв. Харһлтд орлцсн баһчуд үүлдвриннь тускар келҗ өгәд, дәкәд ямаран керг күцәхәр зуралҗахин тускар хувалцв.
БАТАН Наталья

Видео