Баһ тетквртә улсиг дөңнхәр

11-12-2020, 17:54 | Общество

Приютна, Октябрьск, Лаганя, Целинн болн Городовиковск райодын КЦСОН-а көдләчнрин бәәрн әмтнд дуудвр кеҗ, җирһлин күнд таалд туссн нег һазра улст дөң болхиг сурв. Үлгүрнь, Лаганя района комплексн төв бәәрн газетд зар барлад, бүрдәцсин, селәнә эдл-ахусин һардачнриг, арһлачнриг эн буйнч седклин кергт демән күргтн гиҗ дуудвр кев. Лаганя района хурл баһ тетквртә улст дөңгән күрглһнд шунмһаһар орлцв. Олна дөңгәр олн зүсн хувц-хунр, һосн, хот-хол цуглулҗ болв. Эн кергин йовудт баһ тетквртә 16 өрк-бүлд дөң күрггдв.
Целинн района КЦСОН-а көдләчнр нег баахн өрк-бүлд дөң күргхәр шиидв. Одахн эднә гернь түүмрт шатад, эдн өлг-эд, хувцн уга үлдв. Баахн өрк-бүлд долата үрн бәәнә, тегәд терүнд өмсх хувц-хунр кергтә болв. «Әрәсән Улан Кирс» гидг ООО-н Хальмгин региональн әңгин ахлач Валентина Будеева эднд хот-хол өгүлв.
Городовиковск района комплексн төвин көдләчнрт бәәрн арһлачнр болн фермермүд ик дөң-тусан күргв. Эдн төвин көдләчнрин хәләврт бәәдг эрмдгтә 2 күүнд, баһ тетквртә 6 өрк-бүлд болн 7 күүкн-көвүнд кергтә хувц-хунр йилһҗ өгв, хот-хоолар эдниг теткв. Буйнч седклин кергт Зуңква гегәнә хурлын лам Ген Ямпхе демән күргв.
Тиигәд Зулын байрин өмн өргнд таңһчин район болһнд баһ тетквртә, уга-яду улст олна дөңгәр нөкд болҗ, буйнч седклин керг бүтәгдв. Эндрк амр биш цагла җирһлин күнд таалд туссн улс эднд демән күргсн өр-өвч седклтә әмтнд ханлтан өргв.
БАТАН Наталья
ЗУРГТ: Приютна района
КЦСОН-а көдләчнр баһ тетквртә өрк-бүлмүдиг хот-хоолар теткв

Видео