Лаганьд «Тег синема» секгдв

14-12-2020, 16:45 | Общество

Әрәсән нертә режиссер мана нег һазра күн Манҗин Эллан седвәрәр бүрдәгдсн «Бумбин орна зөөр» гидг саң «Сойлын таал» гидг федеральн төсвин халхар грант шүүҗ авч Лагань балһснд кинотеатр тосхҗахин тускар бидн урднь зәңглсн биләвидн. Хальмг улсин Зулын байрин өмн өргнд энд түрүн хәләһәчнрин төлә киносеанс болв. Шидр болхла Хальмг Таңһчин Толһач Хаска Бату тиигәрән одад, кинотеатриг байрин бәәдлд секв. Эн темдгтә керг-үүлдврт режиссер Манҗин Элла, таңһчин сойлын болн зуульчллһна министр Түрвән Саглр, Лаганя района муниципальн бүрдәцин толһач Очра Очр орлцв.

- Эн төсв ик даавртаһар болн сән чинртәһәр күцәгдв. Мана таңһчд кино делгрүлхмн. Юңгад гихлә мана таңһчин, хальмг улсин сойлын, авъяс-заңшалын тускар олнд медүлх кергтә. Мана таңһчд билгтә баһчуд олн бәәнә, эдн Манҗин Эллаһас болн эн халхд нер һарчах талдан улсас үлгүр авч билг-эрдмән делгрүлҗ чадх гиҗ санҗанав. Бичкн селәнд,эс гиҗ балһснд өсәд-боссн болв чигник күцәмҗд күрч чадхв гиҗ ицх кергтә, зуг терүнә төлә цугинь кех, үүдәгч кевәр үүлдх кергтә. Билг эрдмәрн ик күцәмҗд күрч нер һарсн улсин үлгүрмүдолн болхла, мана таңһч делгрәд, сәәхрәд йовх, – гиҗ Бату Сергеевич келв. «Тег синема» гидг нертә кинотеатрт
сән ясврин көдлмш кегдв, ода 50 күн энд сән таалд кино хәләҗ чадхмн, бичкдүдин төлә кафе энд бәәнә. Келхд, билетин үн ик биш, эннь 70 арслң тогтахмн. Тегәд
әмтн өрк-бүләрн ирҗ цаган сергмҗтәһәр давулҗ чадх. Санитарн-эпидемиологическ некврәр энд һаран эд-бод кедг эварһс бәәнә, бәәриг эд-бод кенә. Эн бәәрнд урднь бичкдүдин көгҗмин школ бәәсмн.Тер талдан ормд нүүснә хөөн эн бәәрн олн җилдән эҗго зогссмн. Бәәрн арһлач Очр-Һәрән Юрий энд бат ясвр кеһәд,һурвн сарин эргцд шин кинотеатрт сән таал тогтав. Хальмг Таңһчин Толһач Хаска Бату болн Лаганя района толһач Очра Очр эн арһлачд ханлтан өргв. Таңһчин сойлын болн зуульчллһна министр Түрвән Саглрин келсәр, эн объект 500 миңһн күн күртл бәәдг селәнд эс гиҗ балһснд кинотеатр секлһнә «Сойлын таал» гидг федеральн төсвәр болн Әрәсән кинон саңгин дөңгәр күцәгдв. Эн кергт 5 сай арслң йилһгдсмн. Тер мөңгәр үнтә кергсл хулдҗ авгдв, терүг Якутин киносетин мергҗлтнр углҗ тәвв. Келхд, энд «Dolby Digital» гидг көгҗмин кергсл болн лазерн проектор олзлгдҗана, тегәд фильмс өөдән чинртәһәр үзүлгдхмн.Эн төсвин некврәр кинотеатрт үзүлгдх фильмсин өрәлнь Әрәсәд кеҗ һарһгдсн кинофильмс болх. Эн өдрмүдт Әрәсән кинотеатрмудт «Серебряные коньки» гидг фильмиг үзүлҗәнә. Лаганя әмтн терүг шинрүлгдсн кинотеатрт хәләҗ чадв. Бәәрн улс эднә балһснд кинотеатр секгдснд ик байрта бәәнә. Бичкдүд түрүн хәләһәчнр болснь хойр дам байрта болв, – гиҗ нертә режиссер Манҗин Элла темдглв.
ДООҖАН Наталья

Видео