ӨР-ӨВЧ СЕДКЛИНЬ ТЕМДГЛВ

14-12-2020, 16:50 | Общество

Элст балһснд эн керг-үүлдврин йовудт 65 наснас ах улст хот-хол күргҗ өггдв. Хотл балһснд бәәдг медәтнрт болн эрмдгтә улст пандемийин цагт өр-өвч седкләрн дөң болсн 6 волонтер ачлгдв. Элст балһсна һардврин толһач Дмитрий Трапезников эднд ханлтан өргҗ, эн күнд цагла талдан улст дөң болх седклән медүлснь олнд үлгүр-үзмҗ болҗахиг темдглв. Сән дурар үүлддг улсин җисән хотл балһснд делгрҗәхнь байрта болҗана гиҗ дааврта һардач келв. Темдглхәс, сән дурар үүлдсн улс дунд балһсна һардврин баһчудын политикин комитетин көдләчнр болн баһчудын ниицәсин элчнр бәәнә. Тиигәд, эн әңгин ах мергҗлт Увшин Церн, «Седвәр» гидг баһчудын төвин һардач Бассирован Марина, «Ринг» гидг ниицәнә элч Нескребинан Мария болн «Первый» ниицәнә элч Дьякона Давид болн ода церглҗ йовх Мучирән Санл медаляр ачлгдв.
Көтчнрә районд бас эн Цугәрәсән керг-үүлдврт өр-өвч болн төрскнч седклтә улс шунмһаһар орлцв. Одахн района муниципальн бүрдәцин толһач Һооҗура Санл сән дурар үүлдҗ нег һазра улст дөң-тусан күргсн Алыка Марияд, Җачан Надеждад, Борлга Гиләнд болн Нимгрә Елизаветад #БиднХамдан гидг Цугәрәсән керг-үүлдвр бүрдәлһнд тәвцән орулсн төләднь Әрәсән Президентин зарлсн медаль болн Күндллһнә һашгуд бәрүлҗ өгв. Хальмг Таңһчин спортын болн баһчудын политикин министрин дарук Шикән Дорҗ Шальдира Амулңд бас медаль болн Күндллһнә һашг бәрүлҗ өгч, Цугәрәсән кергт орлцснднь ханлтан өргв. Көтчнрә районд әмтнәс орҗ ирсн 300 эрлһәр дөң күрггдв. Района бәәрн улс болн талдан һазрт ода көдлҗ йовх әмтн эн кергт демән күргв. Тиигәд олна дөң-тусар пандемийин цагт өнр-өсклң болн баһ тетквртә өрк-бүлмүдт, медәтә болн гемтә-шалтгта улст эдн нөкд болв.
Баһ Дөрвдә районд бас эн кергт шунмһаһар орлцсн улсин ач-тус темдглгдв. Района толһач Лиҗин Сарң сән дурар нег һазра улст дөң күргсн Очаныка Маринад, Хаска Элзәтд, Бембин Санлд, Баран Натальяд, Мучкан Александрад медаль болн Күндллһнә һашгуд бәрүлҗ өгв. Нәәмн сарин эргцд Очаныка Маринан һардврт аһу ик көдлмш кегдв. Эдн 598 бәәрн күүнд хот-хоолар, эд-таврар дөң күрглһнә керг бүрдәв. Района арһлачнр, фермермүд болн талдан өр-өвч седклтә улс эн кергт демән күргв.
Зулын өмн өргнд цуг райодар #БиднХамдан гидг Цугәрәсән керг-үүлдврт орлцсн седвәртә, шулун-шудрмг улсин ач-тус өөдәнәр үнлгдҗ, эднд ачлвр бәрүлҗ өггдв. Цуг нарт-делкәд эн хальдврта гемәс иштә нәрн бәәдл тогтсн цагт цуһар арһ-чидлән негдүләд, хамдан олна төлә иим сән керг бүтәснь җирһлин күнд таалд туссн улст чидл урһаҗ омг өгв.
ДАВАН Наталья

Видео