Әмтнә патьрмудт дулан

14-12-2020, 16:54 | Общество

Шидр бидн муниципальн үүлдврин 3-ч әңг одад, терүнә һардач Тепкенкин Тимурла харһҗ күүндвидн. Эн әңгин медлд хотл балһсна ар үзг бүклдән орна. Энд «КГУ», «Ар үзгин», «Таңһчин эмнлһн», «УИН», «4-ч микрорайона 1-ч чеерүд», «Г.Молокановин» болн «10-ч микрорайон» гидг дулаһар теткдг станцс бәәнә. Эн әңг бәәдг котельнс олн давхр гермүдиг, бичкдүдин садмудыг, сурһульмудыг, эмнлһнә бүрдәцсиг, предприять-бүрдәцсиг дулаһар теткнә.
- Эн җил эртәр киитн болв, тер бийнь мана котельнс дигтә-даратаһар үүлдв, мана медлд бәәдг олн давхр гермүдин әмтнә патьрмудт дулан. Электрокүчәр бас тасрлтан угаһар теткгдҗәнә. Зуг икәр орсн цасн маднд харш болв, тегәд котельн күртл хаалһсиг цеврлх кергтә билә. Эн үвлд бидн сән белдвр кеввидн, ясврин көдлмш кеҗ, хамг кергслән чикләд, сольсн биләвидн. Тегәд дулаһар тетклһнә кергиг даавртаһар күцәхдән белн бәәнәвидн, – гиҗ Тимур Иванович келнә.
Эн җил «КГУ» гидг котельнд ТВГ-8 тамһта шин хәәсн углҗ тәвгдв, көдләчнрин төлә сән таал тогтагдв. Дулаһар тетклһнә кем эклснәс авн эдн дөрвн селгәһәр көдлҗәнә. Көдләчнрин күч-көлс харлһна төрт энд ик оньг өггднә, шишлң хувц-хунрар болн хальдврта гемәс саглуллһна кегдлмүдәр теткв. Эн җил эпидемиологическ нәрн бәәдл тогтснас иштә көдләчнрин эрүл-менд харлһнд, хальдврта гемәс саглуллһна кергт онц оньг өггдҗәнә. Котельнд батлгдсн диг-дараһар бәәриг «Анолитар» эд-бод кенә. Келхд, энүг «Энергосервис» бийнь кеҗ һарһна.
Тепкенкин Тимурин келсәр, намрин-үвлин кемд дулаһар тетклһнд әңгд ик эртәснь белдвр кегдв. Хаврас авн намр күртл энд аһу ик көдлмш күцәгдв. Хотл балһсна 4-ч микрорайонд 18-ч, 19-ч болн 20-ч гермүд тал шин модульн котельняс авн дулаһар тетклһнә хаалһ шинрүлгдв. Энд бәәсн хуучн төмр турвасин ормд өдгә цага материалар кегдсн турвас углҗ тәвгдв. Тер мет 8-ч, 9-ч болн 10-ч гермүдин болн П.Чонкушовин нертә эрдм-билгин колледж күртл бас шин турвасар дулан өггдҗәнә. Дәкәд бичкдүдин медицинск төвин медлд болн 5-ч микрорайона 7-ч тойгта герин өөр бас турвас сольгдв. Ут тоодан 100 метр турва сольгдсн билә.
«Энергосервис» үүлдврин 3-ч әңгд дөч һар күн көдлнә. Эдн дунд олн җилдән энд көдлҗ байн дамшлт хоршаҗ өөдән мергҗлттә көдләчнр бәәнә. Эннь оператормуд Җамбин Светлана болн Куликован Наталья, слесарьмуд Бутенкон Андрей, Көкманҗин Валерий болн Огородниковин Михаил, лаборантнр Дорҗин Маргарита болн Аксена Ольга мөн. Көдлмштән дааврта, дигтә-тагта улсин ач-тусар хотл балһсна әмтнә гермүдт болн социальн бүрдәцст үвлин кемд дулан болна. Үвлин теңгрт иткл уга, гиҗ хальмг улс келнә. Тегәд теңгрин бәәдл ямаран болв чигн мана гермүдт даңгин дулан болх гиҗ нәәлхмн.
ДАВАН Наталья

Видео