Вирас ноха – түрүн нөкд

14-12-2020, 17:05 | Общество

Одахн Лаганя районд бәәдг Баран Герман шишлң нохата болв. Энүнд Әрәсән эрк биш социальн даатхлһна саң реаблитацин эв-арһсар тетклһнә көтлврәр эн нохаг өгв. Вирас гидг нертә ноха нүднә харань тату улст хаалһ һатлхд, лавкд күрхд нөкд болдгиг дассн ноха болҗана.Герман Владимирович урдаснь хойр долан хонгт Подмосковьед бәәдг тиим нохасиг дасхдг сурһульд одад, Вирасла өөрхн таньлдв. Эн сурһуль мана орн-нутгт нүднә харань тату улст нөкд болдг нохасиг белддг ор һанцхн тиим бүрдәц болна. Тәвн җилин эргцд эн сурһуль дөрвн зун миңһн ноха белдәд, сохр улст дөң болдгиг дасхсмн. 2009 җилд Баран Герман тиим ноха авсн билә, тернь көгшрәд өңгрснә хөөн залу күүнд талдан ноха йилһҗ өггдв.
- Би бичкнәсн авн шалтгта болҗанав,җил ирвәс нүднә харам муурад ода тас юм үздгән уурв. Ода 1-ч багин инвалид болнав. Түрүләд нанд немш овчарк билә.Тер ноха арвн җилдән нанд дөң-тусан күргв. Ода нанд Вирас нертә ноха бәәнә,бидн өдр болһн лавк, пошт, ветеринарн аптек однавидн. Лабрадор тохмта ноха әмтнлә ээлтә, бичкдүдт йир дурта. Һаза эк-эцкнр харһхларн күүкдтнь нохаг көндәҗ болхиг сурхла би зөв өгнәв. Болв зокалар талдан улс иим нохаг көндәх зөв уга болна. Вирас эргндк һазриг шинҗлҗ,шин маршрутар соньмсна, Лагань балһсн энүнд таасгдв гиҗ келҗ болҗана. Энтн мини түрүн нөкд болҗана, – гиҗ Герман Владимирович келнә.Әрәсән ФСС-ин Хальмг Таңһчар үүлддг региональн әңгин зәңглсәр, мана нег һазра күүнд лабрадор-ретривер тохма ноха өгв. Эрк биш социальн даатхлһна саң җил болһн иим нохасин эздүдт терүг асрлһнд болн малын эмчд үзүллһнд демин мөңг йилһҗ өгнә. Эн җил тер демин мөңгнә кемҗән 25 миңһн асрлң болв. Җил болһн демин мөңгнә кемҗән сольгдна. Нөкд болдг иим нохаг реабилитацин онц көтлвр бәәдг гемтә-шалтга улс авч чадҗана. Терүнд реабилитацин тиим эв-арһ керглгдҗәхин тускар заагдх зөвтә. Реабилитацин онц көтлвр авсна хөөн эрмдгтә улст ФСС-ин региональн әңгд ирх кергтә, тенд иим шишлң ноха авхд дөң күргхмн.
БАТАН Сәәхлә
ЗУРГТ: Баран Герман Вирас

Видео