Шалтгта улсиг дөңнв

16-12-2020, 19:19 | Общество

Цуглулгдсн хот-хол Элстин медәтнрин болн гемтә-шалтгта улсин, Элстин коррекционн сурһуль-интернатд күргҗ өгв. Таңһчин экономикин болн хулд-гүүлгәнә министрин дарук Марианна Воробьеван келсәр, Зулын өмн өргнд эн Цугәрәсән буйнч седклин керг давулгдснь хойр дам темдгтә болв. «Эн керг-үүлдвр Әрәсәд һурвдад давулгдҗана. Министерствин дуудвриг таңһчин күцәгч йосна органмуд дөңнҗ шунмһаһар орлцснь байрта болв. Пандемий учрсн цагт өр-өвч седклән медүлҗ, җирһлин күнд таалд туссн улст дөң-тусан күрглһн эркн чинртә болв. Социальн бүрдәцст бәәдг гемтә бичкдүдт болн медәтнрт эндр нег үлү мана оньг керглгдҗәнә», - гиҗ Марианна Воробьева келв. «Щедрый вторник» гидг буйнч седклин керг-үүлдврт селәнә эдл-ахун, йиртмҗин көрңгин болн эргндк йиртмҗ харлһна, спортын болн баһчудын политикин, сурһуль-эрдмин болн номин, жилищн-коммунальн эдл-ахун болн энергетикин министерствс, РСФБК, ветеринарийин заллт шунмһаһар орлцҗ, бичкдүдт болн медәтнрт хот-хол, кергтә нань эд-тавр цуглулв. - Мана бичкдүдт олн зүсн эд-тавр йилһҗ өгснд, хот-хоолар тетклһнд орлцсн таңһчин күцәгч йосна органмудт болн арһлачнрт ик ханлтан өргҗәнәв. Шин җилд цуһар эрүл-менд бәәтхә, цугтан хөвтә җирһл эдлтхә, - гиҗ Элстин коррекционн сурһуль-интернатын һардач Очалан Мингиян келв.
БАТАН Сәәхлә

Видео