Бичкдүдт - шин җилин белг

18-12-2020, 21:51 | Общество

«Калмыкия» гидг зәңгллһнә таңһчин агентствин һардач Марила Хоңһр төрскн келәр һардг газетин умшачнриг өөрдҗ йовх Шин җилин байрла йөрәһәд, барт бичгдлһнә кем төгсҗ йовна, тегәд дурта һарцсан дөңнҗ бичүлҗ автн гиҗ дуудвр кев. Сән авъяст тохрсар Хар Һазра, Көтчнрә, Октябрьск, Лаганя болн Яшкулин райодын әмтн «Хальмг үнн» газетиг сәәнәр дөңнҗ җил болһн бичүлҗ авна. Мана агентствин медлд барлгддг «Байр», «Байрта» болн «Теегин герл» һарцсиг бас бичүлҗ авхиг агентствин һардач таңһчин әмтиг сурв. «Би җил болһн ээҗдән «Хальмг үнн» газет бичүлҗ өгдг биләв, эн җил экдән газет бичүлҗ өгв. Өдгә цагт челендж гидг керг-үүлдвр давуллһн авъяст тохрв, тегәд цуһар төрскн келәр һардг газетиг дөңнҗ эк-эцкнртән, аав-ээҗнртән бичүлҗ өгий. Таңһчд бәәдг эс гиҗ төрскн һазрасн хол йовх улс эн кергиг дөңнҗ терүнд орлцтн» – гиҗ Хоңһр Анатольевич келв.
«Хальмг үнн» газетин шеф-редактор Пүрвән Любовь келсәр, эн җилин хойрдгч өрәлд 3620 күн мана умшачнрин тоод орв. Тегәд эдниг урмдулхин төлә эн лотерей давулгдҗана. Мана умшачнрин төлә мөрә хулдҗ авлһнд төрскнч седклтә улс дөң-тусан күргдгиг Любовь Валентиновна темдглв. Хамгин түрүнд Әрәсән орн-нутгин Хүүвин депутат, Хальмгин Герой Адучин Баатрт, арһлачнр Помпан Викторт, Пован Константинд бидн ик ханлтан өргҗәнәвидн гиҗ эн келв. Лотерейд 39 олн зүсн белг шүүгдв, терүнәснь өңгтә телеүзл хамгин үнтә мөрә болв.
Дарунь лотерей эклв. Терүг давулсн Келн-улсин телеүзлин журналист Тихоновин Чингис кенд ямаран мөрә күртсиг олнд медүлҗ өгв. Келхд, эн җил чик авг-бәрц батруллһна, эрүл-мендин бәәдл шинҗллһнә кегдлмүд белгүд дунд олн болснь учрта гиҗ сангдна. Тиигәд, мөрә шүүҗ авсн умшачнр дунд полицин көдләчнр, райодын муниципальн бүрдәцсин, сурһуль-эрдмин көдләчнр харһв. Сән авъяст тохрсар, Б.Б.Городовиковин нертә Хальмг ик сурһулин оютнр болн багшнр мана газетиг җил болһн дөңнҗ бичүлҗ авна, тегәд эдн бас мөрә шүүҗ авснь байрта болв. Лаганя района «Тополёк» бичкдүдин сад өңгтә телеүзл шүүҗ авв, күүкд-көвүд дурта мультфильмсиг хәләҗ чадхмн.
«Хальмг үнн» газетин олн умшачнриг өөрдҗ йовх Шин җилин байрла йөрәҗ, цуһар эрүл-менд, хөвтә-кишгтә бәәтн гиҗ дурдҗанавидн. Ирх долан хонгин чилгч күртл мана газетиг бичүлҗ авх цаг бәәнә, тегәд умшачнрин тоод орҗ, төрскн келәр һардг һарциг дөңнтн гиҗ сурҗанавидн.
ДАВАН Наталья

Видео