Үкр җилин өлзә цугтаднь күрттхә!

30-12-2020, 18:41 | Общество

ШУГРАН Вера, Хальмг олн-әмтнә шүлгч, Хальмг АССР-ин сойлын ачта көдләч:
- Хулһн җил һарад, Үкр җил эклв. Эн җил амр биш болв. Тер бийнь бидн һарсн җилд ханлтан өргҗ, ирх җилд цуг нарт-делкәд бәәдг улсин җирһлд сән йовдл учрх гисн ицлән гееҗәхшвидн. Эн җил мана таңһчин төлә ончта болв, бидн Хальмг автономь бүрдснә 100 җилин өөниг темдглвидн. Мана Әрәсән ик өрк-бүлд хальмг улс талдан келн-улсла хамдан ниитә бәәҗ, төрскн һазр-уснаннь цецгәрлтин болн босхмҗин төлә үнн-чик седклтәһәр көдлҗ, дорас өсч йовх баһ үйд чик сурһмҗ өгч, билг-эрдмән болн сойлан делгрүлҗ йовна. Мана буурл теегин олн келн-улс давҗах җилд сансн тоотан күцәһәд, бас нег өөдмд күрәд, ни-нег кевәр җирһҗ бәәнә. Хальмг Таңһч тогтун тавар кех-күцәхән шунлдулҗ йовна. Терүнә төлә чидл чигн, арһ чигн бәәнә, эрдмтә улс чигн баһ биш.
Давҗах 2020-ч җил мини җирһлд чигн ончта болв. Олн улс намаг төрсн өдрләм, ончта өөнләм йөрәв, халун мендән илгәв. Теднд цугтаднь би ик ханлтан өргҗәнәв. Күн болһна келсн үг мини седклд нар урһаҗ, чидл-омг өгч, цааранднь чигн үүдәгч кевәр үүлдҗ олн үүдәврмүд бичхд урмдта болв.
Хальмг Таңһчин улсиг орҗах Шин җиллә әрүн цаһан седкләсн йөрәҗәнәв. Шин җилд бәәсн кевәрн зуг хамдан, зуг уралан йовҗ, улата теегән кеерүлий, толһа менд, то бүтн бәәцхәй гиҗ эңкр һазриннь олн-әмтнд йөрәлән илгәҗәнәв. Үкр җилин өлзә цугтаднь күрттхә!

Видео