ШИН ҖИЛ байрта-бахта БОЛТХА!

30-12-2020, 18:47 | Общество

Күндтә мана умшачнр! Эн һарчах хулһн җил коронавирусас, хар зудас көлтә цуг маднд амр биш болв. Тер бийнь цаг негәр бәәдмн биш. Бидн хамдан эн күнд цаган һатлад, тадн маднд итклтә болад, эн нарт-делкә деер хальмг келәр һардг мана газетиг дөңнҗ, бичүлҗ авад, маднд урмд өгәд бәәнәт. 2021-ч җилин түрүн өрәлд “Хальмг үнн” газетд бичгдлһнә кем эн сарин 31-д төгснә. Тегәд цуг мана умшачнрт ик гидг ханлтан өргҗәнәвидн! Тадн төрскн газетдән дөң күргсн деерән, далад дусал немр гишң хальмг кел делгрүллһнд, батруллһнд тәвцән орулҗ бәәнәт! Цуг тадндан ачта!

Нә, мана күндтә умшачнр!
Шин җиллә тадниг йөрәҗәнәвидн!
Бәәсн һазрин байн сәкүсн хәәрлҗ,
Цуг тадн ханядн-тома уга бәәҗ,
Бәәсн һазриннь заян-сәкүснд багтҗ,
Зурһан зүүлин хамг әмтнә хормад багтҗ,
Кесн көдлмштн кемтрг уга,
Келсн үгтн үнтә болҗ,
Шин җилин сән җирһлд багтҗ,
Эн ик үүмәтә цагт
Кен-негндән җөөлн үгән келҗ,
Седкл-ухаһан медлцҗ,
Арһ-чидлән ниицулҗ,
Нег-негндән нөкд болҗ,
Амн үгәрн дөңнҗ,
Кен-негнәннь мууһинь дарҗ,
Кен-негнәннь сәәһинь өргҗ,
Ө-өшән, һундл уга,
Хан Теңгр хәәрлҗ,
Хамг әмтн амулң эдлҗ,
Бурхн Теңгр өршәҗ,
Буйн-кишг ирҗ,
Окн Теңгр өршәҗ,
Олн-әмтн җирһҗ,
Бурхн-шаҗн делгрҗ,
Байрта-бахта цугтан бәәхиг
Деедин олн бурхдын
Делкән Цаһан Авһан сәкүсн евәтхә!
БЕМБИН Евгений

Видео