Өрк-бүләрн эмчәр көдлҗәнә

30-12-2020, 19:53 | Общество

Эн җил коронавирусн гемәс хөрлһн хамгин һоллгч төр болв. Пандемий эклснәс авн бидн тойг болһнд эпидемиологическ бәәдлин, хальдврта гемәс хөрлһнә госпитальмудын үүлдврин болн терүнд көдлҗәдг эрүл-менд харлһна көдләчнрин тускар бичсн биләвидн. Эндр болхла бидн Баһ Дөрвдә района эмнлһнә эмчнр Увшин Данил Җирһл хойрин болн эднә өрк-бүлин тускар бичхәр шиидвидн.
Данил Дорджиевич одахн Бурять Республикәс ирв, эн Хальмгин делегацин ханьд тиигәрән одҗ коронавирусн гемәс хөрлһнд бурят улст дөңгән күргв. Джиргал Отрядовна болхла П.Жемчуевин нертә таңһчин эмнлһнә улд үүлдҗәдг госпитальд мөрн сарин чилгчәс авн эндр күртл көдлҗәнә. Ууһн Санл көвүнь бас эмч, эн ода Москвад нер һарсн Коммунаркд бас госпитальд көдлҗ, COVID-19 гемәр гемтсн улсин әм аврлһнд туслҗана. Эк-эцкиннь болн ахиннь үлгүрәр отхн Агни бас эмчин эрдм шүүҗ авхар шиидв. Ода күүкн 11-ч класст сурна.
Убушиевихн Баһ Дөрвдә эмнлһнд һуч шаху җилдән көдлҗәнә. Эдн Әәдрхн балһснд медицинск институтд сурчасн цагт таньлдад, тенд өрк-бүлән өндәлһсмн. Данил Дорджиевич бийнь Аршан Зелмнә күн болна, Т.Хахлынован нертә медицинск училищ төгсәснә хөөн эн Сарпан района Салын Тугтн селәнд күч-көлснә хаалһан эклв. Тенд тавн җилдән селәнә участкин эмнлһ һардҗ көдлснә дару эн Әәдрхнә мединститутд эмчин эрдм дасхар орв. Тенд эн Җирһллә таньлдв. Джиргал Отрядовнан экнь медсестра билә, наһц эгчнь эмчин эрдмтә мөн. Тегәд бичкнәсн авн Җирһл эмчин эрдмтә болхар шиидсмн. Әәдрхнд сурһулян төгсәснә дару Джиргал Отрядовна тенд педиатрар көдлв, юңгад гихлә Данил Дорджиевич ода чигн оютн бәәсмн.
– Пандемий экләд П.Жемчуевин нертә таңһчин эмнлһнә улд госпиталь секгдхлә намаг таңһчин эрүл-менд харлһна министерствин зааврар терүнд көдлмшт йовулв. Түрүн авгтан йир әәмшгтә билә, юңгад гихлә эн түрүн болҗ учрсн гем болҗана. Болв бидн мергҗлтән өөдлүләд, байн дамшлтан олзлад, гемтә улст дөңгән күргдг болвидн. Зуни кемд йир күнд билә, маальг гемәс саглуллһна шишлң хувц-хунр өмсчкәд, өдр болһн кесг частан көдлх кергтә болв. Сүл цагт гемтә улсин то икдәд бәәнә, дәкәд күнд кевәр гемнь давҗах йовдл бас икдв, – гиҗ Джиргал Отрядовна келнә.
Данил Дорджиевич Бурятьд хальдврта гемәс эдгәлһнә госпитальд түрүн өдрәс авн көдлв. Анестезиолог-реаниматолог болад, эн күнд гемтә улст дөң күргдг бәәсмн. Тер мет Хальмг Таңһчин эрүл-менд харлһна көдләчнр Бурятин үүрмүдтә дамшлтарн хувалцҗ, эмнлһнә үүлдвриг бүрдәлһнә туст сүв-селвгән өгч дөң болв. Күнд таалд амрл угаһар көдләд, Данил Дорджиевич бийнь тенд гемнәд, судцна төвд эмнлһ авад хәрҗ ирв. Бурятин Правительствин Ахлач хальмг эмчнрин, тер тоод Увшин Данилын ач-тус темдгләд, Ханлтын бичг бәрүлҗ өгв.
Эк-эцкнь пандемий эклсн цагас авн гүҗрҗ көдлҗәх цагла отхн Агни күүкнь ээҗин хәләврт бәәв. Ода эн сурһулян арднь орҗ сурад, шүүврән өгхәр белдҗәнә. Санл ахнь дү күүкндән сүв-селвгәрн нөкд болна. Эн ода медицинск номин кандидатын цол харсхар белдвр кеҗәнә. Санл Данилович кардиохирург болна. Гилән авальнь бас эмч, эдн Москвад Айлана күүктәһән бәәнә. Ач күүкнь сурһулян йилһән сәәнәр сурчахнь аав-ээҗднь ик бахмҗ болҗана. Эн җил Убушиевихнә өрк-бүлин төлә күнд болсн бийнь байрта йовдлмуд бас учрв. Тиигәд Санда күүкнь хәрд һарад, ууһн көвүндән Бат нер өгв. Эн Саратовск юридическ академьд сурчана, удл уга юристин эрдмтә болх.
– Шин җил иртл ахр цаг үлдв. Сән авъяст тохрсар бидн өрк-бүләрн цуглрад, эн җилин аш диглҗ, ирх җилд кех-күцәһән зуралхвидн. Эн җил цуг нарт-делкән улст йир күнд болв, тер бийнь бидн цуг тоотыг дааҗ һарвидн. Бидн чигн өрк-бүләрн цуһар гемтәд эдгвидн. Кесг күүнд бидн дөң күргҗ, эн хальдврта гем диилхд туслвидн. Көвүн-бер көдлҗәнә, күүкмдн сурһулян төгсәҗәнә, хәрд һарв. Мана Бат зе көвүн ода һурвн сарта. Отхн Агни күүкн сурһулян сәәнәр сурчана, эмчин эрдмтә болхар зүткҗәнә. Бәәсәрн байн болҗ, олна хормад багтҗ тааста эрдмәрн цааранднь чигн көдлҗ йовх санатавидн. Эн хальдврта гемиг бидн эрк биш диилҗ чадхвидн гиҗ ухалх кергтә. Мана таңһчин цуг әмтн эрүл-менд бәәтхә, ирх җилд цуһар хөвтә-кишгтә болтха! – гиҗ Увшин Данил Җирһл хойр нег һазра улсан йөрәв.

ДООҖАН Наталья

Видео