Икр көвүдт – Киитн Аавин белгүд

30-12-2020, 20:08 | Общество

Чимдә Басң Полина хойрин өрк-бүлд тавн җил хооран Бату хан, Заян, Нарн болн Миңгиян икр көвүд һарсмн. Эн ончта йовдл цуг мана таңһчин улст ик байр-бахмҗ үүдәв. Эн җил көвүд тавта болв. Бидн олн үртә эк Полинала шидр күүндәд, көвүд Шин җилин байрт ямаран белдвр кеснә тускар соньмсвидн.
Көвүд Элст балһсна 5-ч тойгта бичкдүдин садт орна, болв пандемий эклсн цагас авн гертән бәәнә. Энд хоорндан ниитә, хамдан наадхдан дурта. Дулан цагт эдн дөрвүлн футбол наадна, велосипедәр эс гиҗ самокатар гүүлгнә. Болв бәәҗ-бәәҗәһәд альвлад, ноолдад чигн һарч ирнә гиҗ экнь келнә. Бату хан келнд сәәнәр орад уга, тегәд эн планшетәр мультфильм хәләхдән, компьютерн наад наадхдан дурта. Заян болн Нарн конструктор цуглулҗ олн зүсн кегдлмүд кехдән таасна. Миңгиян болхла соньмсг, әмтнлә ээлтә көвүн болна. Бату хан ардасн һурвн дүүһән дахулсн көвүн болад, оньдин нүүрт йовна, эн шулун-шудрмг гиҗ экнь келнә.
Эн җил көвүд «Маленькие Эйнштейны» гидг немр сурһулин клубд ордг болв. Сурһмҗлач Баина Григорьевна Дорджиеван һардврт көвүд олн зүсн кегдлмүд кенә, зургуд зурна, һарин эрдмән делгрүлнә. Сурһульд орхиннь өмн эдн то-үзг дасч, келән өргҗүллһнә занятьст орна. Шин җилин байрин өмн өргнд көвүд Киитн Аавин туск шүлгүд дасч авв.
Дәкәд эн җил икр көвүдин 5 җилин өөнд нерәдәд, бәәрн арһлач Уфима Людмила эднд хальмг баатрмудын хувц белглв. Полина бер келсәр, Людмила Баторовна эднә өрк-бүлд урднь чигн хальмг хувц белглсн билә, Алдр Диилврин 75 җилин өөн угтҗ салдсмудын хувц бас уйҗ көвүдин зург цокулсмн.
– Одахн мана өрк-бүлиг Цугәрәсән Киитн Аав йөрәснь байрта йовдл болв. «Киитн Аавин зуульчллһн» гидг орн-нутгт болдг керг-үүлдврин медлд НТВ телеканал мана өрк-бүлин тускар келәд, Киитн Аавин белгүд илгәв. Көвүдт олн зүсн наадһас, хойр күүкнд һарин эрдмин кегдлмүд кедг тоот болн шикр-балта белглв. Мана ууһн Алтана арвн тавта, эн 10-ч класст сурна. Даяна арвн негтә, ода 5-ч классин сурһульч болна. Хойр эгч дүүнртән цань уга эңкр, арднь орҗ сәәнәр хәләҗ, маднд итклтә нөкднр болҗ өсчәнә. Шин җилин байриг бидн өрк-бүләрн гертән темдглхвидн. Бидн олн зүсн сенр хот белдҗ, һацуран эргәд ду-бииһән үзүләд амрхвидн. Эн асхн манаһур Киитн Аав гиичлҗ ирәд, бичкдүдиг Шин җиллә йөрәхмн, – гиҗ Полина келв.

ДАВАН Наталья

Видео