Лавкин єазак біідлинь ясрулхар

11-02-2021, 16:09 | Общество

Цаг негір йовдго гиљ мана ґвкнр келљісмн, тиим оњдарлт ода ирљ йовна. Урднь лавкан секхір седхлі, дала мґњгн бііхлі нам зун љилдін імтні дґњ угаєар урєљ йовсн, зуна халунд сўўдрті серўн єазртнь медітнр чигн, баєчуд чигн амрчасн бґдўн модыг агчмин зуур уга кеєід, керчід-кґрідід уга кедг юмн.

Тер йовдлыг ўзсн улс невчк шууглдад, газетд бас статья єарла. Яєад імтиг сурлго тиим ґршіњгў уга юм кесмб гиљ зўтклдљієід, цааранднь юмн болсн уга. Элст балєсна єардвр эс гиљ депутатнр мод кґрідід уга кесні тґлі кесг мињєн эс гиљ нам нег сай арслњга ялд уњєалєна туск заквр єарєсн болхла тиим юмн учршго билі.
Зуг тиим заквр ода чигн уга. Тегід балєсна уульнцст тірсн моднас кесгнь усн угаєар хагсад, салькнд нііхлід унн гиєід бііні.
Элст балєсна 8-ч микрорайонд біідг «Улан-Цаєан» гидг лавкин ґґр йовхла тиим ухан орна. Лавкин шидр нам тротуар гисн юмн уга, машид ўўдні ґґрнь ирљ зогсад, хур-чиг орсн кемд бальчг єарна. Чиг чииглхлі энўні ґґр йовљ болхш.
Зірмнь хаалєин хаљуєар йовна, тернь бас ик іімшгті, яєад гихлі энд дала машин гўўні, эн хаалєар 8-ч микрорайонас балєсна цутхлњд кўрч болљана, тегід ґдр-сґ уга энд кґлгн йовад бііні. Жолач согту болхла хаалєин хаљуєар йовсн кўўг діврід чигн бііхмн.
Тер лавк микрорайона тал дунд зогсљасн болхла, ўг нам єаршго билі. Болв імтн нааран-цааран йовдг хаалєин амнд болн тротуарин хаљуд лавк бііршлљіні. Энўні эзнь талдан улсиг дураєад, эргндк єазриг дигті-даратаєар чолуєар бўркід, хаалєин захас хашалсн болхла, машид тротуарар йовад біішго.
Тер «Улан-Цаєан» гисн лавкс микрорайон болєнд бііні, єазриг ніімідллєнд авсн болљана, 8- ч микрорайона лавкур імтн тасрхан угаєар ирдг болна. Тиим єазр эднд дала мґњг шињгіх арє ґгні, болв тедн лавкин єазак біідлд оньган ґгхш.
Зуг балєсна єардвр, депутатнр эн туст ухалљ тиим біідлиг уурулх зґвті. Ірк хулддг лавкас кґлті балєсна зууєад імтн іімшгті йовдлла харєх зґв уга. Удл уга Орн-нутгин Хўўвд суњєвр болхмн, тегід балєсна ик гисн микрорайона суњєачнр љирєлин таалынь ясрулхла, іімшг уга біідл тогтахла депутатнрин кандидатнрт зуг ханлтан ґргх. Йирдін ніімідллєнд лавкан ґгсн улсас улм чањєар некљ, тедні даавринь ґґдлўлх кергті, тиигхлі балєсна імтні љирєл ясрад йовхнь лавта.

ЉААХАН Бадм

Видео